Birthday boy Jeje-a a langsar

Indian Super League-ah Jeje Lalpekhlua'n a pianchamah goal hnih a khung a, Mizo tlangval khelhna Chennaiyin FC-in hma hruai reng mah se Delhi Dynamos-in hun tawp dawna an sut avangin 2-2 in an inhnehtawk.

Chennaiyin-in match kua aṭangin point 17 an hmu a, an chak zawh loh avangin an chungah Bengaluru FC an awm. I League aṭanga ISL zawm Bengaluru hian Sunil Chettri goal hmangin ATK an hneh a, match kuaah point 18 an hlawh chhuak.

Jeje–Goal 2
January 7 zanah Chennaiyin leh Delhi Dyanmos te an inkhel a, Chennai mipuiin an club tana khel tam ber Jeje-a piancham tih an hriatpui. Jawaharlal Nehru Stadium-ah inkhel entuten 'Happy Birthday Jeje' an ti dual dual a, Mizo tlangvalin goal hmangin mipui lawmna a siam thung.

Delhi Dynamos-in minute 24-naah David Ngaihte hmangin an khung hmasa a, Jeje hian minute 42-na leh 51-naah a pet goal a, Chennaiyin hi chak tura ngaih an ni. Hun tawp hma hretin Delhi tan Guyon Fernandez-a'n an siphurh a sut a, Jeje piancham lawmna boruak tidai deuh mah se India ram football-ah Mizo tlangvalin hmun pawimawh a chang tih hmuh hmaih theih a ni lo.

Hming a chher zel
Jeje hi Hero of the Match atan thlan a ni a, inkhelh banah club neitu zinga mi Abhishek Bachchan leh a nupui Aishwarya Rai ten thlalak puiah an sawm. Bollywood star larna ram India-ah chuan Jeje thlen chin hi a sang hle.

Abhishek leh Aishwarya te fanu Aaradhya-i'n 'Jeje' awmzia a hre lo a, 'Je' tih hi goal tihnaah a ngai a, Jeje hian goal hnih a khung avangin 'JeJe' an tiah a ngai a, goal thum chu khung se 'JeJeJe' an ti turah a ngai. Kum ruk leka upa Aaradhya-i tan chuan Jeje leh goal inanga a ngai hi thilmak a ni lo–Mizo tlangval leh goal hi thuk takin a inzawm tlat.

Chennaiyin striker Jeje chuan, "Ka pianchamah hian I League emaw ISL ka la khel ngai lo a, ka khelh vawi khatnaa goal hnih ka khung hi ka lawm. Amaherawhchu kan duh chu chak a ni a, kan chak zo lo erawh pawi ka ti hle," tiin Vanglaini a hrilh.