League Cup Semifinal Pep Guardiola a fimkhur dawn

Carabao Cup semifinal first leg chu zanin dar 1:15 hian khelh a ni dawn a, Manchester City chuan Eithad Stadium-ah Championship club Bristol City an mikhual ang. Second leg hi January 23 zanah Bristol khelmual Ashton Gate-ah khelh leh tur a ni.

League Cup semifinal pakhat zawkah Chelsea leh Arsenal te an inkhel dawn a, London Derby hmasa zawk hi Stamford Bridge-ah January 10, Nilai zan dar 1:30-ah khelh a ni ang.

Nomawi duh Pep
Manchester City manager Pep Guardiola chuan, "Club lian ni tur chuan nomawi chawi hi a ṭul a ni. Manchester United leh Liverpool te anga sulhnu ropui hnutchhiah tur chuan chak a ngai a, nomawi chawi a ṭul a ni," tiin champion a duh thu a sawi.

Spanish manager hian Barcelona leh Bayern Munich te enkawl tawhin Spain leh Germany-ah nomawi ṭhahnem tak chawi tawh mah se City a la champion pui lo. Pep-a tan League Cup hi English club a enkawl hnua a nomawi chawi theih hmasak ber a ni ang.

City boss Pep chuan, "Bristol chungchang thlithlai tura kan club aiawha kal ten fimkhur turin min chah. Anni hian semifinal thleng turin Premier League club pali an hneh a, kan fimkhur a ṭul ang," tiin Championship tlak lakah inthlahdah a tum loh thu a sawi.

Manchester City-in awlsam takin semifinal an thleng lo. Pep-a hote hian an match hmasa berah West Bromwich Albion 2-1 in an hneh hram a, hemi zawh hian Wolverhampton Wanderers chu penalty shootout hmangin an hneh leh bawk. Quarterfinal-ah City-in Leicester City an hneh a, hetah pawh penalty shootout hmang thoa chak an ni.

Bristol lam...
Bristol-in semifinal thleng turin Manchester United chu 2-1 in an hneh a, Jose Mourinho hote an hneh hma hian Premier League club pathum Crystal Palace (4-1), Stoke City (2-0) leh Watford (3-2) te an hneh.

Championship club Bristol hian anmahni awmna division hnuai lam club pakhat chiah an hmachhawn a, League One club Plymouth Argyle chu 5-0 in an sawp. An kal chhoh dan thlir chuan Man City aiin Bristol dinhmun a ṭha zawk a, amaherawhchu an player neih dan aṭanga thlir chuan Pep Guardiola hote an chungnung fal.

Bristol City boss Lee Johnson chuan, "Sawisel boa Man United anga team ṭha hneh chuan inrintawkna nasa tak min pe a ni. Team ṭha tak tak kan hmachhawn tawh avangin huaisen takin Man City pawh kan hmachhawn ang. Guardiola naute khel ka en chang hi chuan an khingpuite hian a tir aṭangin an hlau ṭhinin ka hria, keini chuan an khelh dan pangngai anga an khelh loh nan dan chah kan tum dawn a ni," tiin an rilru put hmang a dik thu a sawi.

Johnson chuan sawi chhunzawmin, "Team ropui tak tak English football-ah hian kan hmu tawh. Sir Alex Ferguson hnuaiah Manchester United an vul a, 'Class of 92' te kha hriat reng tlak an ni. Hemi hma hian Liverpool an ropui a, tuna kan hmuh City pawh hi hetiang ang bawka English football mawitu an ni," tiin an khingpui tur team a fak.

Bristol City hi Championship-ah palina an ni mek a, Manchester City-in Premier League an thunun thung. Zanin inkhel turah hian Man City chu chak zawk tura a dah a ni a, Bristol hian second leg thlenga beiseina an la nei zel a nih chuan Championship club tan result ṭha tak a ni thei ang.