Wesley Sneijder-a'n Qatar lam a pan

Inter Milan leh Real Madrid midfielder hlui Wesley Sneijder chuan Qatari club Al-Gharafa a zawm a, thla 18 cham turin contract a ziak. Kum 33 mi midfielder hian nipui transfer lai khan Galatasaray chu a chhuahsan a, Ligue 1 club Nice a zawm.

Mahse, Dutch midfielder hian France-ah beisei angin a hming a chher lo a, match li chiah a khel hman tihin 2022 World Cup khelhna tur Qatar lam a hawi ta zawk a ni. Kum 2010 World Cup-a Netherlands-in final an luhna kawnga player pawimawh Sneijder chuan, "Ka tan chona thar duhawm tak leh phurawm tak a ni," tiin a sawi.

Sneijder-a khelhna tur Al-Gharafa hi an ram league lamah an che ropui rih lo hle a, team 11 inelnaah hian pasarihna dinhmun an luah mek–he team-ah hian Manchester City leh Bolton midfielder hlui Vladimir Weiss chu a khel ve mek bawk.

Netherlands tan match 133 khela ram tana inlan hnem ber dinhmun luah mektu Sneijder hi a vanglai chuan khawvela midfielder ṭha ber pawlah chhal a ni a, 2009-10 season khan football-a a kum ṭhat ber kum hmangin Inter Milan chu treble champion a nihpui a, ram tan World Cup final a khel bawk.

Ajax, Real, Inter leh Galatasaray-ah te league nomawi a chawi vek a, khawvel huapa hriat hlawh player zingah Barcelona midfielder hlui Xavi Hernandez chu Qatari club tho Al Sadd tan a khel ve mek bawk. Spain international hlui hian season tawpah inkhelh chawlhsan tawh a tum nia sawi a awm thung.