Vawiinah Manipur inlan dawn : Assam-in Arunachal an hneh hram

Santosh Trophy 2018 - North East Zone Qua­lifying Round chu nimin khan Lammualah khelh ṭan a ni a. Group A inkhelah Assam-in Arunachal Pradesh 1-0 in an hneh a, he group hi Mizoram awmna a ni.

Vawiin tlai dar 2:00 hian Tripura leh Manipur te an inkhel dawn. Group B-ah Meghalaya awm bawkin group khat aṭangin team khat zelin final round an lut dawn.

Goal khat chauh
Group A-ah Assam chu Mizoram elpui ni pha tura ngaih an ni a, veteran coach Subrata Bhattacharya kaihhruai team-ah hian 2010 Santosh Trophy top scorer Akum Ao leh Dutch club PSV Eindhoven tan pawha trial tawh Milan Basumatary te an inkawp.

Assam tan Arunachal Pradesh hneh chu harsa turin lang lo mah se goal khung an harsat miau avangin chak turin vanneihna an mamawh. Nimin inkhela goal awmchhun hi minute 73-naa Arunachal defender Nyali Ete-a'n a lama a tauh luh a ni.

Arunachal keeper Tashi Topgey-a'n Assam striker Milan-a goal khung tur ṭum thum nghawt a dang a, goal theihna tur veka ngaih a ni a. Substitute Mintu Boro-a'n a chance ṭha neihah keeper Tashi zawnah tak a kal bawk.

Nimin inkhelah Assam-in chak phu mah se Arunachal pawhin goal khungna tur an nei a, first half-ah RD Karma ball pet chu Assam keeper Arup Baruah-a'n ṭha takin a dang a, Vivek Gurung-a goal khung tur ṭha takin a dan sak bawk.

Engtin zel?
Assam coach Subrata Bhattacharya chuan, "Chance kan hlah hnem lutuk deuh a ni. Goal khat chauh a chak tur kan ni lo. Amaherawhchu point khat ai chuan point thum chu a ṭha zawk," tiin an result-ah a lawm loh thu a sawi.

Subrata chuan sawi chhunzawmin, "Group khat aṭangin team khat chauhin final round an lut dawn a, result pakhat kan ngaichang ang. Mizoramin goal hnih china Arunachal an hneh chuan kan match tawpnaa chak chu kan tihtur a ni. Mizoram hi kan hlau tur a ni lo," tiin a sawi.