Inpuahchahna kan nei ṭha - Mizoram manager

Santosh Trophy 2018 - North East Zone Qualifying-ah Mizoramin an match hmasa berah Arunchal Pradesh chu January 10, Nilaini tlai dar 2:00 hian Lammualah an hma­chhawn dawn. Mizoram manager Hmingthansanga chuan inpuahchahna an neih ṭhat thu Vanglaini a hrilh.

Mizoram hi group A-ah Arunachal leh Assam te an awm ho a, final round-ah team pakhat tan chauh hmun a awm.

Hmingsanga chuan, "Training kan nei ṭha a, player-te bakah coaching staff-ten theihtawp an chhuah avangin final round hi kan thlen ngei ka beisei. Player-te pawh a intluktawk vek a, kan squad a in balance ṭha hle. Starting eleven thlengin thlan a harsa dawn a, hei erawh thu ṭha lam a ni," tiin team chungchang a sawi.

Santosh Trophy 2014-ah Mizo­ram an champion a, he mi hnu hian final round an la thleng vek. Nikum aṭang khan football hmanga state hrang hrang inelna dan hi thlak danglamin playing eleven-ah Under 21 player pathum tal chhawr ngei ngei a ngai.

Hmingsanga chuan, "Under 21 player chhawr dan tur bituk thlap a nih avangin he dan hian kan player thlan dan pawh a nghawng dawn a, rawlthar ṭha tak tak kan kawl avangin he dan chhiatpuitu aiin ṭhatpuitu zawk kan nih ka beisei," tiin a naute a rintawk thu a sawi.

Lawmthu sawiin Hmingsanga chuan, "MFA-in kan mamawh apiang min pe a, min duhsakna avangin kan chungah kan lawm takzet. Ka player-te chhungte chungah hian lawmthu sawi ngei a ṭul a, hunawl ṭha tak an pek avangin training ṭha takin kan nei thei a ni. Heng zawng zawngin hi Mizoram tan vek a ni a, player leh coaching staff chuan theihtawp kan chhuah a, mipui lamin kan inkhelh hun aṭangin hna a nei dawn. Arunachal Pradesh kan hmachhawn hun aṭangin ṭawiawmna ṭha tak kan beisei a ni," tiin inkhel en turin Mizo mipui a sawm.