Hyderabad lakah Awadhe Warriors an zawr

Premier Badminton League khelh mekah Pathianni zan khan table hmahruaitu Hyderabad Hunters chuan Awadhe Warriors chu 5-0 in an sawp a, tun season PBL league match bika inhnehna nasa ber a la ni.

Nehru Indoor Stadium, Chennai-a inkhelah Kidambi Srikanth, B. Sai Praneeth leh Carolina Marin te bakah Saina Nehwal a awm avangin ngaihven a hlawh zual.

Amaherawhchu, Hyderabad Hunters lam tan mixed doubles-ah Markis Kido leh Yoo Yeon-seong ten hnehna an chan hnuah mipa single khelh zui a ni a, Lee Hyun-il chuan Indian shuttler Parupalli Kashyap lakah 2-1 in hnehna a chang zui nghal; Indian tlangval pahnih B. Sai Praneeth leh Srikanth inkhelah Praneeth a dingchang bawk.

Hunters an kaltluang a, Awadhe Warriors tan dinchhuahna hun an siamsak duh lo. World number 1 hlui Carolina Marin leh Saina Nehwal ten hmeichhe singles khel zui lehin, Rio Olympic champion Marin hian minute 20 chhung lekin 15-5, 15-7 in hnehna a chang.

PBL match li an khelhah Hyderabad Hunters hian point 14 hmuin table hmahruaitu an ni a, league match vawi khat khelh tur an la nei. Match nga khel tawhtu Awadhe Warriors hian point 12 hmuin palina an ni thung–semifinal lut tur chuan team dang result an ngaihchan a ngai dawn.