Juventus hmachhawn tur Bologna

Serie A chuan Thawhṭanni zan khan league match an khelh chhunzawm leh tur atan fixture an ti chhuak a, champion lai Juventus chuan an match hmasa ber atan June 22-ah Bologna an lenchilh ang.

Italian football hi coronavirus vanga hun rei tak chhung chawlh a nih hnuin June 20, Inrinni aṭangin khelh ṭan a ni leh dawn. Hripui len hnua match hmasa ber atan hian Torino chuan Parma an mikhual dawn, inkhel zawng zawngah hian a hmuna entu an awm dawn lo.

League an khelh ṭan hma karah Italian Cup chu khelh chhunzawm a ni dawn, hri len hma khan semifinal first leg khelh tawh niin; AC Milan leh Juventus 1-1 in an inhnehtawk a, Napoli chuan Inter Milan lakah 1-0 in hma an hruai. Semifinal second leg leh final khelh hmabak an la nei.

Serie A khelh hmabak zawng zawng hi match 124 a la ni a, match hnuhnung ber atan July 23 hian Lazio leh Cagliari ten an khel ang - ni 43 chhungin an khel zo dawn tihna a ni. Khawthlang media ṭhenkhat chuan July thlaah chuan a hmuna entu awm theih an beisei thu an tarlang - hei erawh beiseina chauh a la ni.

Italian Football Federation (FIGC) ruahman dan chuan inkhel pakhatah mihring 300 vel bak an inhnamhnawih dawn lo; Germany lama an lo kalpui tawh dan a ni. Player bakah coaching staff, journalist pawh duh zat zat kal theih a ni dawn lo.

FIGC president Gabriele Gravina chuan, "Stadium-a mipui 60,000 awm hulh hulh ang kha chu ka ngaihtuah ngam lo, tlem talin an en theih erawh duhthusam a ni thung," tiin league match tawp lam tal chu entu nei chunga khelh an chak thu a sawi.

Tun hnai season riat chhung chu Juventus-in Serie A nomawi an chawi vek a, kuminah hmahruaitu leh rinkai ber an ni. Maurizio Sarri naute hian match 26 an khelh tawhah point 63 an hmu, pahnihna Lazio aia an sanna chu point khat chauh a ni thung.

League goal 27 khung tawh Ciro Immobile awmna Lazio hian an match hmasa ber atan June 24, Nilaini zanah Atalanta an hmachhawn dawn. Atalanta hi kumina Champions League khel phak, season tharah pawh UCL khelh leh tum an nih avangin a awlsam dawn lo.

Antonio Conte enkawl Inter Milan dah bo theih an la ni bik lo. Inter hian season bul an ṭan fuh a, hmahruai lai pawh an nei. Mahse, kuminah an che fuh tawk lo, an match hnuhnung berah Juve an ngam lo bawk. Turin club an phak lohna point kua ni mah se match khatin an khel tlem zawk a, an tan kawng a la awm.