Mizoram khelh hun a thleng ta

Vawiin hian National Football Championship for Santosh Trophy North East Zone qualifying round-ah Mizoram an inlan dawn a, tlai dar 2:00 hian Lammualah Aruna­chal Pradesh an hmachhawn ang.

Pakhat tan chauh
Group A-ah Mizoram, Assam leh Arunachal Pradesh te an awm a, team pakhat chiahin final round an lut dawn.

Assam-in an match hmasa berah Arunachal 1-0 in an hneh a, goal awmchhun hi Nyali Ete-a'n an lama a khung a ni. Group A aṭang hian Arunachal hi table mawngphaha awm tura ngaih an ni a, anni hian kum li chhungin qualifying round-ah chak hmel an hmu lo.

Match kua an khelhah Arunachal hian vawi riat an khingpui an hneh lo a, vawi khat an inhnehtawk. Mizoramin Santosh Trophy an champion kum khan Lammualah Arunachal nen hian inhmachhawn a, 4-0 in an chak. January 29, 2014-a inkhelah hian Mizoram tan Lalfakzuala, Zico Zoremsanga, F. Lalrinpuia leh William Lalnunfela te an khung a, heng player-te hi tun ṭumah hian an tel tawh lo.

Mizoram hian an match hnu­hnung bera Assam nen an inkhelh huna draw chauh tawk turin Arunachal hi goal hnih chauh a an hneh a ṭul dawn a, hei hi a thleng lo a nih chuan thilmak tiha sawi theih a ni hial ang.

Assam coach Subrata Bhatta­charya pawhin, "Arunachal lak­ah goal khat chauh kan khung avangin Mizoram hneh turin kan inpuahchah a ṭul a ni," tiin a sawi a, Mizoram hi goal hnih tala an chak a rinawm hle.

Mizoram hi...
Mizoram coach Lalsangzuala Hmar hian nikum khan Santosh Trophy-ah Mizoram team a enkawl tawh a, tawnhriat a nei ṭha tawh. Sanga hi coach zinga MPL nomawi vawi hnih champion hmasa ber a ni a, a ropuina belhchhah turin club hrang a champion pui bakah season zawnin nomawi a chawi bawk.

MPL6-a Chhinga Veng cham­pion puitu coach Sanga chuan, "Arunchal Pradesh khelh dan kha uluk takin kan zir a, an tlarhnung kha an insiam ṭha lo a nih chuan a ṭhiah theih dan tur kaw hnih thum kan hmu. Training-naah pawh uluk takin kan zir a, kan hman theih ngei kan ring. Chutihrualin football-ah chuan engmah a sawi lawk theih a, ṭawng pawr thei kan la ni lo," tiin a sawi.

Team chungchang sawi zuiin Sanga chuan, "Player 20 dam ṭha vek leh khel thei tura rintlak vek kan nei a, chanchin lawmawm a nih rualin thutlukna siam pawh a har dawn. Match hnih chauh kan neih avangin player-ten khelhna hmun an chang a nih chuan qualifying round chauh thlir loin final round thlenga thlirin an theihna zawng zawng an chhuah a ṭul ang," tiin Vanglaini a hrilh.

Engtin zel?
Santosh Trophy-ah hian pla­ying eleven-ah Under 21 player pathum tal an awm reng a ṭul dawn. Mizoram hian kum 21 hnuai lam player paruk keeper F. Lalmuanawma, defender pahnih K. Lalmalsawma leh Hming­thanmawia bakah midfielder pathum Lalromawia, Ṭhasiama leh Lalmuan­zova te an kawl a, MPL-a player langsar ni phak vek an nih avangin coach Sanga tan buaina a ni lo ang.

Mizoram tana pawimawh tur erawh goal a ni dawn a, chuvangin tlarhma lam mawhphurhna a sang ang. Forward koh zingah MC Mal­sawmzuala, Lalrammuanpuia, Lal­rammawia leh Lalremruata te an awm a, heng player chawm tur hian midfield-ah MPL6 best player R. Malsawmtluanga a awm bawk avangin Lammualah minute 90 chhung­in goal an khung ngei a rinawm.

Entu Mipui
Lammualah Mizoramin ṭawi­awmtu an nei ṭha ṭhin a, Mizo mipui hi football team chakna hnar a ni. Manipur-in kum 2014-a Mizoram an hneh loh chhanah entu mipui chu an puh tel a, chuvangin tun ṭumah pawh hian Mizoramin ṭawiawmtu ṭha an mamawh ang.

Mizoram coach Sanga chuan, "Mizoram aiawh a nih chuan kan theihna zawng zawng kan chhuah ṭhin a, chutihrualin ṭha lehzuala khelh kan duh a nih chuan mipui puihna kan mamawh a ni. Arunachal nen kan inkhelh hun aṭanga min ṭawiawm nghal turin Mizo mipui kan sawm a ni," a ti.