Chelsea mualah Arsenal fiahna

Arsene Wenger-a nauten tun hnaia an talbuaina lak aṭanga chhuah theihna hun ṭha an nei dawn. Zanin dar dar 1:30 hian League Cup semifinal first leg khel turin Chelsea an lenchilh dawn a, an hna hi a awlsam dawn lo tih a chiang. January 24-ah seond leg chu Emirates Stadium-ah khelh a ni leh ang.

London club pahnihte hian match an ngah avangin FA Cup-ah player ṭha an chhawr lo a, Gunners an tlak laiin Blues hian replay an khelh a ngaih phah bawk. Tun hma aiin club an intluk tawkin nomawi chawi a harsa zual tawh a, hnehna chang tur chuan team pahnih hian an player neih ṭhat an thawhchhuahpui a ngai dawn.

Kumin League Cup semifinal-ah hian Video Assistant Referee (VAR) hman ṭan a ni. Nizan khan Manchester City leh Bristol City ten semifinal pakhat zawk an khel tawh a, final thlengin VAR hi hman chhunzawm tura tih a ni.

A vawi khat nan?
Arsenal-in League Cup an chawi hnuhnun ber chu kum 1993 daih tawh kha a ni, French manager Wenger-a'n a enkawl chinah player naupang zawkte chher nan a hmang ṭhin a, 2007 leh 2011 khan final lut ve bawk mah se an la champion miah lo.

Wenger-a'n a chet fuhna ṭhin FA Cup-ah a naute a mualpho pui a, kum 1996 aṭanga Arsenal a enkawl hnuah third round an paltlang zawh loh vawi khatna a ni. Premier League nomawi beisei ngam a ni tawh lo a, a la champion lohna League Cup leh Europa League te chiah a beisei thei tawh–inelna pahnihah hian a vawi khat nan champion a duh zual dawn.

Kum 68 mi Wenger hi hrem a nih avangin khelmual chhungah a naute a la ho thei dawn lo, kum 2011 hnu lama chak ni hmel an la hmuh lohna hmuna hnehna hlado chham tum hi thil awlsam lo tak a ni ang. Club pahnihte hi tun season chhungin vawi hnih an intawng tawh a, chak zawk awm loin an la inhnehtawk ve ve a ni.

Nottingham Forest an hneh loh hnuah Wenger-a'n nomawi an chawi theihna tur a nih dawn chuan League Cup-ah player ṭha an chhawr tur thu a sawi a, Alexis Sanchez, Mesut Ozil, Alexandre Lacazette leh Jack Wilshere ten Blues lakah inkhel bul an ṭan rual ṭhawt thei tura ngaih a ni.

Gunners hian Saed Kolasinac, Nacho Monreal, Olivier Giroud leh Santi Cazorla te an chhawr theih dawn loh bakah Laurent Koscielny leh Aaron Ramsey te dinhmun a chiang lo bawk.

Conte tan a pawimawh
Chelsea manager Antonio Conte-a'n tun hnaia match an ngah avangin inkhel zawng zawng a hautak thu a sawi a, Premier League nomawi an kawl lai humhim a harsat tawh dawn bawk avangin season dang aiin League Cup hi a pawimawh–he inelna bika an champion hnuhnung ber chu 2015 kha a ni.

Italian manager Conte chuan, "Match kan ngah avangin player tinte inkhel tura an inpeih vek a ngai, Arsenal kan hmachhawn zawh hnuah league match khelh a ngai dawn a, chumi hnuah FA Cup replay a ni leh nghal ang. Nithum danah inelna chi hrang hrang kan khel zel a ni a, a awlsam lo hle," tiin a sawi.

Blues hian hliam vanga hun rei tak an chhawr theih loh David Luiz an nei let leh tawh, Brazil international defender hi FA Cup-ah minute 90 chhung a inkhel thei tawh a, Gunners lakah pawh inlan thei tura ngaih a ni.

Chelsea hian Norwich an hmachhawn ṭumin Eden Hazard an chhawr thei lo a, Belgium international forward hi a chawn hliam vangin Arsenal lakah pawh a inlan theih a la beiseiawm loh–player pawimawh langsar dang hliam an nei rih lo thung.