Stan Wawrinka a inkhel thei dawn

Stan Wawrinka chuan tun hma lama nomawi a chawi tawhna Australian Open-ah a inlan theih ngei a beisei thu a sawi. Swiss star Wawrinka-a'n a dam thu a sawi hi tournament buatsaihtu leh tennis ngaina tute tan chanchin lawmawm a ni.

Grand Slam vawi thum champion tawh Andy Murray leh Kei Nishikori te bakah hmeichhe player hlawhtling ber pakhat Serena Williams ten an inlan theih loh tur thu an sawi tawh a, world number 1 Rafael Nadal leh Novak Djokovic te pawh hliam dam hlim an ni–Wawrinka pawh season hmasa lam aṭanga inkhel thei lo a ni a, tun hnaiah a rawn dam leh chauh.

Kum 32 mi Wawrinka hi nikum Wimbledon hnuah a khup na vangin a la inkhel leh lo. Thla ruk a chawlh chhungin a ranking pawh pakuanaah a tla hniam hman a, kum 2014-a a hlawhtlin tawhna hmunah chona thar a hmachhawn leh dawn.

Wawrinka chuan, "Hun rei tak ka chawlh hnuah tournament khel turin ka inpeih ve leh ta a, ka tan chuan hei aia chanchin lawmawm a awm thei chuang lo," a ti. Tournament director Craig Tiley chuan, "Stan hi a inkhel lai ka hmu a, Melbourne-a inlan turin a inpeih," tiin a sawi ve bawk.