Nomawi chawi duh Harry Kane

Harry Kane chuan Tottenham Hotspur tan khelh nuam a tih thu a sawi a, chutih rualin hlim taka inkhel reng tur chuan nomawi chawi a pawimawh thu a sawi chhuak.

Spurs manager Mauricio Pochettino-a'n a striker hi North London club tana a football nun hmang zo hial tawh tura a duh thu a sawi a, mahse tun hnaiah Kane hi European club lian dangte awh rawn a nih miau avangin Argentine manager pawh hi a thu sawiah a ṭang huai ngam lem lo.

England international hian kum 2016 khan Tottenham tan kum nga daih contract a ziak a, kar tin £100,000 a hlawh mek. Kane-a hlawh zat hi tam viau mah se tunlai player langsar dangte hlawh nena khaikhin chuan a tam lo hle.

Kum 24 mi Kane chuan, "Ka sawi fo tawh angin hmasawn zel ka duh a, ka thawkrim bawk. Nomawi chawi ka duh a, he hmuna hian hlawhtlinna kan chang thei a nih phawt chuan nuamti tak leh hlim tak chungin ka khel reng thei ang," tiin a sawi.

Premier League striker hriam ber pakhat Kane hian an tan league nomawi a beisei awm tawh loh thu a zep lo a, tun season chhunga an ban phak hnaivai ber chu FA Cup a nih rih thu a sawi tel bawk.