Manipur-in Tripura an hneh

National Football Championship for Santosh Trophy North East Zone qualifying round-ah Manipur-in Tripura 3-0 a hnehin bul an ṭan a, goal thum lai khung mah se Meghalaya an la hmachhawn dawn avangin final round lut turin an dinhmun a la ṭha lo.

Tripura hian January 11-ah Meghalaya an hmachhawn ang a, January 13 hian group B inkhel hnuhnung berah Meghalaya leh Manipur te an inkhel ang. Group khat aṭangin team khat chauhin final round an lut dawn.

Goal thum
Manipur-in nimin inkhelah bul an ṭan ṭha a, minute 10-na lekah Jerry Onesemas Pulamte-a'n goal a khung a, minute 10 hnuah Manoharmayum Aboy Sharma hmangin goal hnihna an khung leh bawk.

Tripura-in defensive game an khel lo chungin Manipur-in second half-ah goal khat chauh an khung belh a, minute 62-naah Ngambam Naocha chuan goal thumna a khung.

Beisei pha lo Manipur!
Manipur-in inkhel thunun mah se team ṭha tia sawi an harsa hle. Midfield-ah Jumkhaibam Jiteshwor Singh chu khaipa a ni a, goal hmasa pahnih pawh a siam sak a ni. Amaherawhchu Jiteshwor hian goal nawr kawngah an forward te a thlawp pha ṭhin lo.

Midfield-a Jiteshwor-a kawppui Naorem Tondomba Singh pawhin tlarhma lam a thlawp ṭha chuang lo a, team ṭha zawk Manipur lamin Tripura an nawr bet thei lo.

Tlarhnunga ding defender pali ten goal venhim hna chauh an thawk nachungin Manipur tlarhnung a la pawp tho a, Tripura forward Banabir Kalia leh substitute Saikat Deb ten Manipur keeper Salam Dinakumar Singh chauh an hmachhawn hnuah an khung lo ve ve.

Manipur-in beisei an pha lo a, chutihrualin team ṭha zawk erawh an ni. Tripura keeper Sashthi Mahato khel ṭha lo se goal tam zawk khung thei tur an ni.

Manipur an buai?
Manipur coach Ratan Elangbam chuan, "Tuna Manipur team kan hmuh hi team ṭha ber an ni lo a, team pahnihna an nih loh chuan pathumna vel an ni. Kan state FA-in team pakua an hrem avangin team pahnih aṭangin player kan thlang thei a, team ṭha thlan a harsa a ni," tiin Vanglaini a hrilh.

Manipur State League-ah team 12 an awm a, team pakua an hrem avangin team pathum chiah an bang. Heng zingah hian Neroca chuan I League an khelh avangin Manipur team hi team dang pahnih aṭang chauh hian an thlang.

Manipur manager S. Amu Tombi Singh chuan, "Goal tam zawk chu duh mah ila, goal thum kha a ṭha tawkah kan ngai. Meghalaya-in keini aiin an khung tam a nih chuan kan match hnuhnung berah chak tumin kan khel ang," tiin an result-ah a lungawi thu a sawi.

North East aṭanga Santosh Trophy-a champion hmasa ber Manipur hian kum 2014 hnuah final round an la thleng leh lo.