Ramsey a inkhel châk tawh

Thla thum chhung deuh thaw chu Covid-19 vangin an inkhel thei ta lo a, tunah chuan chanchin ṭha lam hriat tur a awm ta. Juventus midfielder Aaron Ramsey chuan khelmual chhungah duhtawka ball pet leh a châk tawh thu a sawi.

Ramsey chuan, "Mimal training kan nei phawt a, chumi hnuah team training pawh tluang takin kan nei chhunzawm leh thei ta. Nuam kan tih leh ngainat ber mai football kan khel leh tak tak thei tawh dawn, tunah chuan hei aia lawmna tur dang a awm chuang lo.

"Ram hrang hrang zingah Italy hi inkharkhip hmasa pawl a ni, kei pawh kan rama haw kher loin Turin-ah ka awm tlang. He hmunah hian ka him tawk tih ka hria, tunah phei chuan harsatna awm loin thil a kalphung pangngaiin a kal thei leh ṭan tawh dawn," a ti. 

Juve-in league match an khelh hnuhnung ber chu Inter Milan an hneh kha a ni a, a hmuna entu awm loah Ramsey hian goal a khung bakah Juve midfield thununtu a ni bawk. League an khelh chhunzawm leh hunah pawh Sarri-a'n a hmang ṭangkai chhunzawm leh ang.

Kum 29 mi Ramsey chuan, "Inter nen kan inkhelh kha nidang ang chu ni se season kal laia match boruak sang ber zinga mi turah ka ngai, mahse hri leng vangin a reh duk a, a nawmna leh hlimawmna pawh a tlahniam hle. Hnehna kan chang a, table chung bera kan awm lehna a nih bawk avangin a hlu thung," a ti.