East Bengal an chelh; Lajong chak
I League chanchin a ngaihnawm zel–champion tum East Bengal-in tun hnaia in la thar Churchill Brothers an hneh thei lo a, khualmualah Goan club hi 1-1 a an inhnehtawkpui avangin point khatah an lungawi a ṭul.
Samuel Lalmuanpuia captain-na hnuaia khel Shillong Lajong-in match thum a zawna chak hmel an hmuh zawh loh hnuah hnehna an chang ve leh ta thung a, an mikhual Indian Arrows chu 1-0 in an hneh.
Churchill thar
Goan club ṭha ni 'ṭhin' Churchill Brothers-in tun season-ah beisei an phak lo a, an match hmasa pangaah an tlawm fai vek. Hei vang hian I League vawi hnih champion tawh tun hnaiah an inlak belh nasa a, ram pawn player Bektur Talgat, Cisse Gwada, Hussein Eldor leh Mechah Koffi lalutin December-a 3-2 a East Bengal ngam lotu kha an ni tawh lo.
East Bengal tan ṭum dang ang bawkin Laldanmawia Ralte chu inkhel bul ṭantir a ni a, Khalid Jamil-a'n Lalramchullova chu bench-ah dah mah se minute 16-na lekah a tlan luhtir leh tho a, Brandon VL Remdika chu bench lamah hun hman tluantir a ni thung.
EB hmaah Koffi
Kolkata club tan Laldanmawia a khel ṭha a, a tlan chak avanga Sialhawk Express tih hminglem an pek winger hian inkhel ṭantir aṭangin Goan club a chhaih mangang nghal–minute 26-na lekah ball cross ṭha zet a nei a, Jobby Justin chuan khualmualah an hmahruaina goal ni turin a khung.
East Bengal hi awlsam takin an chak mai dawn nia a lan laiin an beisei ang ngawt erawh a ni lo. Team indin thar Churchill-in awlsam taka tlawm an tum tawh lo a, minute 75-naah an beisei goal an sual chhuak–striker thar Koffi chuan a club thar tana a match hmasa berah goal a khung nghal a, Goan club tan point khat hlu tak a hlawh chhuak. Kum 29 mi striker hi Oman Professional League-ah pawh top scorer lo ni tawh a ni a, Churchill tan a vul chhunzawm a nih pawhin a mak lo ang.
Arrows ngamtu Lajong
Shillong Lajong-in Indian Arrows an hmachhawn hmasakin 3-0 ngawtin an mualpho a, Indian rawlthar rual hmaah tlawm nawn an tum lo. Lajong tan Samuel Lalmuanpuia langsar mah se Zemabawk North tlangval vanneih zan a ni lo a, minute 80-naa Abdoulaye Koffi goal khung chu Lajong chakna a ni.
Samuel hian minute 10-na lekah Hardy Cliff tan ball duhthusam siam sak mah se Khasi tlangval hian goal-ah a chantir thei lo. Meghalaya club-in Deepak Tangri handball vangin penalty hlawh chhuak mah se Samuel-a'n goal-ah a chantir thei lo a, freekick hmanga bar a pet per hnuah hun tawp hnaih lamah woodwork a tih per leh bawk–Arrows tan Edmund Lalrindika'n inkhel bul a ṭan ve bawk a, Lunglei rawlthar hian goal a keng tel bik lo.
Tlaiah Bagan
Aizawl FC laka hnehna chang hlim Mohun Bagan chu vawiin tlaiah an inlan dawn a, Sanjoy Sen-a'n a hna a chawlhsan avanga Shankarlal Chakraborty enkawlna hnuaia khel club hian tlai dar 5:30-ah Minerva Punjab an mikhual dawn–team pahnih hi an intawn hmasakah 1-1 in an inhnehtawk.
Minerva hi Aizawl FC laka 2-1 a an tlawm hnuah insiamṭha lehnghalin Gokulam Kerala FC chu 1-0 in an hneh a, match sarihah vawi khat chiah la tlawmin zaninah tawh an khirh dawn tih a chiang–Bagan an duai dawn bik lo. Kolkata club lian hi AFC laka an khelh dan enin Shankarlal hnuaiah an insiamṭha tawh tih a chiang a, Minerva lakah hnehna chan ngei an tum ang.