Chak mah se Chennai beiseina a tawp

Premier Badminton League champion lai Chennai Smashers chuan a zawna vawi hnih chak ni hmel an hmuh nan Bengaluru Blasters chu 3-2 in hneh mah se semifinal lut turin beiseina an nei tawh lo.

Chennai tan an chhuanvawr PV Sindhu chuan Trump match-ah Scotland nula Kirsty Gilmour chu 15-9, 15-14 in a hneh leh a, Indian shuttler hian an match hmasa lamah world number 1 Tai Tzu Ying a hneh tawh bawk.

Amaherawhchu, Chennai Smashers hian season bul an ṭan fuh tawk lo a, league match nga an khelh tawhah point 12 hmuin table-ah pangana an ni a, khelh zat inangah palina Awadhe Warriors an tluk lo. An chungah hian Ahmedabad Smash Masters, Hyderabad Hunters leh hmahruaitu Bengaluru Blasters an awm bawk.

PBL-ah team pariat an inel a, an inkhelh kual hnuah a sang paliin semifinal an thleng dawn. Janaury 11-ah league round hi khelh zawh a ni ang.