Marco Reus-a'n inkhelh a chak tawh

Borussia Dortmund midfielder Marco Reus chuan a beisei anga a hliam a dam chak thu leh inkhelh a chak tawh thu a sawi chuak.

Bundesliga lamah thlasik chawlh an hmang mek a, tunkar tawp hian league match an khel chhunzawm leh ang. Dortmund hian Pathianni zanah Wolfsburg an mikhual dawn a ni.

Dortmund hian season chawhnu lam inbuatsaih nan Zulte Waregem chu friendly match an khelhpui a, striker Pierre-Emerick Aubameyang goal hnih hmangin 3-2 in an hneh.

Germany international Reus chuan beiseina a neih thu sawiin, "Tun thleng chuan ruahman leh beisei angin thil a kaltluang rih, Dubai-ah training ka nei ṭha hle a, ka thil tih theih chinah ka lawmin ka hlim hle a ni. Season chawhnu lamah chuan club tan a ṭangkai thei ang bera inlan theih ka inbeisei," tiin a sawi.

Kum 27 mi Reus hian a rawn kir hun tur tak sawi chiang thei lo mah se February thlaah chuan inkhel thei tawh tura beisei a ni a, nipui laia khelh tur FIFA World Cup khelh a duh a nih chuan ṭhiante zinga training neih theih thuai a pawimawh thu a sawi bawk.