Floyd tan Floyd

Division ngaa world champion ni thei Floyd Mayweather chuan Minneapolis police kut tuara thi George Floyd vuina senso zawng zawng tumsak a duh.

George Perry Floyd hi May 25, Thawhṭanni khan Minneapolis police kut tuarin a thi. Police officer Derek Michael Chauvin chuan Floyd hi a khupin leiah a nghawngah a nawr bet, minute 8 leh second 46 zet leiah a nawr beh avangin a nunna a chan phah.

US chanhinbu lam tarlan danin George Floyd-a chhungten Mayweather inphalna hi tihhlawhtlinsak an remti. Kum 43 mi Mayweather hian a vuina tur khaw pathum Houston (George-a te khua), Minnesota leh Charlotte-a senso a tum ang. 

Hei chauh hi a ni lo, George-a chhungte hian a vuina hi hmun liah neih an duh a, Mayweather hian a tumsak tel dawn niin an sawi.

Mayweather Promo-tions CEO Leonard Ellerbe chuan, "Heti taka thil phal hi kei chuan mak ka ti. Chutihrualin thu dik ngei a ni a, a vuina senso hi a tum dawn. Floyd hi kum 20 chhung chu midang tan a luang chhuak tawh a ni," tiin a sawi.