Wembley-a inpeih: England tan final luhna hun ṭha?

England legend Alan Shearer-a'n, "England tan tun ang aia final luhna hun ṭha a awm chuang lo," a ti a, he thu a sawi lai hi Three Lions-in Ukraine (quarterfinal) an hmachhawn dawn khan a ni.

Shearer hian Ukraine chiah a dah nau lo a, hetihlaia England tana semifinal-a hmachhawn theih tur Czech Republic leh Denmark pawh a dah sang lo tihna a ni - zanin dar 12:30-ah Denmark nen semifinal an khel dawn.

English mipuiten 'It's coming home' tiin football neitu nia an inchhalna nen Wembley-ah ngei European champion nih an tum dawn a, a kawng hmasa chu Denmark hneh phawt a ni. Danish mipuiten #Londoncalling tih thupuia hmangin an ram pasalṭhate fehchhuak tur ṭan turin an insawm bawk a, London khawpuiah football hmanga rorel an tum - zanin inkhel a hmuhnawm loh ring suh.

Golden generation dik tak?
Frank Lampard, Wayne Rooney, Ashley Cole, Paul Scholes, Steven Gerrard, John Terry leh Rio Ferdinand te awmna team kha 'golden generation' tia sawi an ni ṭhin a, mahse, he team hian nomawi chawi chu sawi loh, major tournament-a semifinal luh pawh an nei miah lo!

Player hming mal ṭheuh pawhin thur chhuak ila, eng team-ah pawh khel phak tur khawpa an 'position' a player thiam bik vek an ni a, coach ropui Pep Guardiola meuh pawhin he squad-in nomawi an chawi lo chu mak a tih thu a sawi.

Mahse, English mipuite beisei loh lam aṭangin Gareth Southgate a lo lang a, Three Lions coach a nih tirha rin hlawh lo tak coach hian World Cup, Nations League leh Euro-a England a kaihhruaiah semifinal a hruai thleng vek ta!

England fans zingah pawh, "Hei hi golden generation chu a ni mai lo em ni?" tia zawhna a piang ṭan a, English mipuiten kum 1966 hnua a vawi khat nan nomawi an beisei e.

Mahse...
England fans-in semifinal-a Italy emaw Spain emaw an tawn loh avangin vannei an inti mai thei a, mahse, Denmark hi Shearer-a sawi ang hian an zuam lutuk a nih chuan an tisual ang.

Denmark hian match nga an khelh tawhah goal 11 ngawt an khung a, match khatah goal 2.21 ang zel khung an ni - goal khung tuma shot an neih zat hi 90 a ni a, target-ah vawi 37 zet an pet thei. England tlarhnung tan fimkhur a ṭul dawn tihna a ni a, tun inelnaa goal la chhuah lo team hian fiahna tak tak an hmachhawn dawn tih pawhin sawi theih a ni - a hmuhnawm dawn.

Three Lions hian match ngaah goal riat an khung tawh a, mahse, Denmark goal khung zat an phak lohna hi goal thum a ni - an inchhuanna ber tlarhmaah an la 'chuti lua' lo a, zanin hi danglamna thlen hun a ni.

Engtin nge?
Zanina Southgate-a team rem dan tur hi hmuh châkawm chu a ni. Germany an hneh ṭumin Southgate hian a formation hman ngai loh hmangin 3-4-3 in a naute a rawn rem a, hei hi wing back chhawr ṭangkai ṭhin Germany dah ṭhat a tumna a ni.

Germany hian 3-4-2-1 formation hmangin wing back Joshua Kimmich leh Robin Gosens chu goal nawr puituah an hmang ṭhin a, Southgate-a'n a formation thlak hmangin nghet takin he team hi a dang chat.

Denmark-in 3-4-2-1 formation tho an hmang ṭhin a, Joakim Mæhle leh Jens Stryger Larsen hmangin tlarhma nawr an pui ṭhin - Southgate-a'n Danish team tana player ṭangkai pahnih dah ṭha turin a team a rem mai ang em, tih chu zawhna a ni.

English coach hian a midfield a ring tawk a nih erawh chuan tlarhnunga defender pali dahin 4-2-3-1 bawk a rin a rinawm - Denmark-in midfield-ah Thomas Delaney leh Pierre-Emile Hojbjerg an nei a, mahse, Southgate-a'n Toni Kroos leh Leon Goretzka inkawp ai chuan a zuam zawk tura ngaih a ni.

Denmark an ṭha
England-in tlarhmaah Harry Kane, Raheem Sterling, Mason Mount, Jadon Sancho, Bukayo Saka, Jack Grealish leh Marcus Rashford te ho an nei a, an player nei ṭha lutuk hi an buaina zawk a ni.

Tlarhnungah Harry Maguire, John Stones leh Luke Shaw te ho an awm avangin an ṭha tawk - Denmark ṭhatna hmuh hmaih erawh a rem lo a, an match hmasa berah Christian Eriksen an chan chungin an buai phah lo.Denmark team tana Eriksen-a ṭangkaizia ngaihtuah chuan an buai phah tura ngaih a ni a, mahse, Mikkel Damsgaard-a'n hming chherna remchangah hmangin zo takin Eriksen-a hmun ruak a luah.

Round of 16-ah Poulsen leh Daniel Wass an chan a, Kasper Dolberg leh Jens Stryger ten zo takin an ai an rawn awh a, Thomas Delaney chauh hnua lut turin Christian Norgaard a awm bawk.

England hian goal chhuah hmasa ta se...
Gareth Southgate-a hoten match nga an khelh tawhah goal an la chhuah lo a, England hian team ṭha Croatia leh Germany te an hneh tawh avangin an khelh dan hi a lungawithlak hle.

Amaherawhchu Three Lions hian goal an la chhuah loh avangin fiahna tak tak an la hmachhawn lo a tih theih. England hian Denmark lakah hian goal chhuah hmasa ta se engtin nge an chhan let ang tih hi a hriat châkawm lai chu a ni.

England chu
Euro 2020-a England khelh dan hi Southgate ruahmanna ang zelin a thlengah a ngaih theih a, English mipuite chuan, "Southgate, nangmah ngei hi ka thinlung ruak hnawh khattu chu i ni," an ti leh der tawh. Croatia nen match hmasa ber an khelh ṭumin England khel a nung a, Raheem Sterling-a'n goal awmchhun khungin chak an phu. Scotland nen erawh chak inbeisei English mipuite an thinur a, mah se point khat an hlawhchhuah avangin group match tawp ber khelh hmain last 16 an lut.

Czech Republic lakah Sterling hmangin goal an khung hma a, inkhel a thi zui. Germany lakah Southgate game plan a hlawhtling a, an khingpui nawrna turte dang chatin second half-a Sterling leh Harry Kane te hmangin an hneh.

Quarterfinal-ah Three Lions-in Ukraine 4-0 in an sawp a, match nga khelh tawhah Southgate-a naute khelh dan a lungawithlak hle.

Mahse maw...
England hi an che ṭha a, fak phu viau mah se vanneih a kaltluang tiin a sawi theih. Germany nen an inkhelh ṭumin 1-0 a hma an hruai laiin Thomas Muller-a'n keeper Jordan Pickford chiah a hmachhawn tawhah goal a khung lo.

Joachim Low hote hian siphurh hi sut ngat se, inkhelh kalhmang a dang daih thei dawn. World Cup 2018-ah khan England-in semifinal an thleng. Khami ṭum khan group match hnuhnung bera Belgium nen an inkhelh ṭumin Red Devils-in Adnan Januzaj hmangin minute 51-naah an khung hmasa a, Three Lions-in a sutna an nei lo.

World Cup last 16-ah Colombia an hneh a, hetah pawh Kane hmangin goal an khung hmasa a, Yerry Mina hmanga Colombia in si phurh an sut hnuah extra time khelh ni mah se an khung belh tawh lo. Chutihrualin goal an chhuah hmasa lo tiin a sawi theih.

Quarterfinal-ah Sweden 2-0 in an hneh a, semifinal-ah Croatia hmachhawnin Kieran Trippier hmangin an khung hmasa a, Ivan Persic-a'n siphurh a sut avangin extra time khelh a ni. Croatia tan Mario Mandzukic-a'n minute 109-naah chakna goal a khung a, England-in minute 11 chiah an neih tawh avangin a chhanletna an nei lo.

World Cup leh Euro tih loa inelna sang leh ber Nations League-ah pawh England hian semifinal an lut a, Netherlands nen an inhmachhawn. Hemi ṭumah pawh hian Marcus Rashford hmangin hma an hruai a, Matthijs de Ligt hmanga Oranje-in siphurh an sut hnuah a chhanletna an nei lo. Extra time khelh a ni a, Kyle Walker-a'n minute 97-naah an lamah a ti lut. England hian a chhanletna an nei lo mai a ni lo a, Netherlands tan Quincy Promes-a'n a khung belh.

Engtin zel?
Gareth Southgate-a hote an kaltluang a, group match leh last 16 bakah semifinal leh final inkhel te chu Wembley Stadium-ah khelh a nih dawn avangin an hmabak a êng hle. Rome khawpuia an inkhelh ṭumin team nem bera ngaih Ukraine an tum fuh a, Andriy Shevchenko hote hi group stage-ah ringawt 4,316 km zin an ni.

Hei chauh hi a ni lo, last 16-ah Sweden nen inkhelin minute 120 chhungin harsa takin hnehna an chang hram. Quarter-final-a England khingpui hi last 16-a Sweden hnehtu Ukraine aiin thahrui an neih tlem zawk avangin an nem zawk.

England hian team ṭha hmachhawn tawh mah se goal chhuah hmasa zawkah an la ṭan miau loh avangin fiahna tak tak an la hmachhawn lo a, Southgate-a team-te hian goal an chhuah hmasak hunah fiahna tak tak an hmachhawn dawn chauhah a ngaih theih. Chutihrualin Harry Maguire, John Stones, Luke Shaw, Kyle Walker leh Jordan Pickford awmna team hian goal chhuah loin inelna hi an khar thei bawk.