Federer leh Djokovic an tlang

Wimbledon khelh laiah champion tura rinkai Roger Federer leh Novak Djokovic te chuan an khingpui ve ve hnehin quarterfinal an lut a, rawlthar beiseiawm zinga mi Alexander Zverev erawh a tla.

Federer hian Grand Slam huangah quarterfinal hi vawi 58 a lut tling ta, ani aia lut hnem an awm lo. World number 1 Djokovic pawh a vawi 50 nan a thiam pariat zingah a inhlangkai, record neih ṭhat lamah Roger chauh hi tluk loh a nei.

Roger a thiam
Thawhṭan zan last 16 inkhelah Federer tan hna harsa a awm lo. Darkar hnih leh minute 11 chhungin a khingpui Lorenzo Sonego chu 7-5, 6-4, 6-2 in a hneh a, a service vawi khat chauh hloh chungin nuamsa takin hnehna a chang.

Kum 39 mi Federer chuan, "Lorenzo hi player hriatthiam harsa tak a ni, beisei leh rin loh ang taka ball a rawn vuak let ṭhin avangin hmachhawn a harsa. Mahse set khatna kan khelh zawh meuh kha chuan a kalphung ka hrethiam tawh," a ti.

Vawi riat a champion tawhna hmunah Federer hi a kaltluang rih hle. All England Club-ah hian ṭum 22 inlan tawhin, heng zinga vawi thum chauh hi quarterfinal thlen loh a nei - kuminah hian rinkai a ni leh mek.

Quarterfinal-ah chuan Daniil Medvedev leh Hubert Hurkacz inkhela chak zawk a hmachhawn leh ang. Court 2-a inkhel hi ruahin a ti buai a, Russian tlangvalin 6-2, 6-7 (2-7), 6-3, 3-4 a hma a hruai laiin an inkhel tluan thei rih lo.

Novak a class
Rafael Nadal hnehin French Open champion a ni thei a, atan thil harsa leh huphurhawm a awm ta meuh lo niin a lang. Novak Djokovic-a'n Wimbledon quarterfinal lut turin harsatna a la tawk lo - Cristian Garin chu 6-2, 6-4, 6-2 in a sawp.

Serbian star hian hnehna chang turin darkar khat leh minute 49 chauh a hmang, semifinal lut tur chuan seeded pangana Andrey Rublev hnehtu Marton Fucsovics a paltlang leh a ngai dawn, hna a hautak ve deuh tawh mai thei.

Seeded pakhatna Djokovic chuan, "Roland-Garros title ka lak khan inrintawkna nasa tak min pek belh, chu chuan ka tan tennis khelh a tih awlsam phah hle," a ti. All England Club-ah hian quarterfinal vawi 12 a lut tling ta chiah.

Djokovic hian major title 19 a nei tawh, a chunga awm Federer (20 titles) leh Nadal te umphak turin vawi khat champion chiah a mamawh tawh. Wimbledon title a la thei a nih chuan a nihrual dawn, chutih rualin inkhel hautak paltlang tur a la ngah.

Zverev a tla
Theihna nei sang, mahse beisei phak lo ṭhin chu Alexander Zverev a ni. German tlangval hi Auger-Aliassime nen darkar li leh minute hnih an inkhelh hnuah 6-4, 7-6 (8-6), 3-6, 3-6, 6-4 in a chak lo.

Canadian tlangval hi rinkai ni lo mah se service a nei ṭha, last 16 inkhelah hian vawi 17 ngawt aces a vaw chhuak. Quarterfinal-ah chuan Italian tlangval Matteo Berrettini nen an inhmachhawn leh dawn, a hmuhnawm ang.

Inkhel dangah Karen Khachanov chuan Sebastian Korda lakah 3-6, 6-4, 6-3, 5-7, 10-8 in hnehna an chang. Set hnuhnung ber bikah hian player pahnihin service an inchhuhsak tawn zat chu vawi 13 zet a ni a, kum 1977 hnu lamah set mala service inchhuhsak a tam ber ṭum a ni.

Khachanov hian Denis Shapovalov a hmachhawn leh ang. Canadian tlangval hian Andy Murray a hneh hnuah Roberto Bautista Agut chu 6-1, 6-3, 7-5 in a hneh leh a, ani pawh hian inrintawkna a nei sang tawh khawp ang.