Brazil dang zo an awm lo
Copa America 2021 final khel turin Brazil an tlang. World champion vawi nga ni tawh hian Lucas Paqueta goal khat hmangin Peru an hneh a, 1-0 a hnehna changin final an in pet kai.
Tukin dar 6:30 hian Argentina leh Colombia ten semifinal hnuhnung zawk an khel, a chak zawk hian July 11, Pathianni zing dar 5:30-ah Brazil an hmachhawn zui leh ang.
Neymar awmna
Nimin zing Nilton Santos Stadium-a inkhelah Neymar-a'n a thiam thil chi hrang hrang a 'show' kual vel a, goal khung chiah lo mah se Peru tlarhnung chhiah buaitu a nih bakah Brazil inkhel chei mawitu a ni bawk.
Peru goalkeeper Pedro Gallese-a'n Neymar leh Richarlison te khung tur ṭha zetin a dang a, Everton forward hian a hnuah keeper hi tlan hel leh mah se a awmna a sir tawh em avangin goal lam hawiin a pet thei lo.
Paris St-Germain forward Neymar erawh ven sen a ni lo, box sira a ball chang chu player pathum ngawtin hual vel mah se a laia awm Paqueta a va siamsak thei tho a, Lyon midfielder goal khung hi tlang nan a tawk.
Midfielder Raziel Garcia leh defender Marcos Lopez te an luh hnuah Peru inkhel a nung thar. Copa America hnuhnung ber final-a an hneh loh team lakah phuba lak tum viau mah se Brazil keeper Ederson an paltlang thei lo.
Argentina an cho
Brazil forward Neymar chuan hnehna an chan hnuah final an khelh tur a thlir zui, player ropui Lionel Messi awmna Argentina nen ngei mai final-ah intawng thei se a duh thu a sawi chhuak.
Copa America khelh laia goal hnih leh assist vawi thum nei tawh Neymar chuan, "Semifinal-ah chuan Argentina ka ṭan dawn, final-ah inhmachhawn ila ka ti. Ka ṭhiante awmna a ni a, nomawi inchuhna inkhelah erawh kan chak ang," tiin fiamthu a thawh zui.
South American football thiam ram pahnih hi Copa America final bika an intawn hnuhnung ber chu 2007 kha niin, Brazil lamin 3-0 in hnehna an chang. Tite naute hi kuminah an khel ṭha tluang a, an rama khel an nih bawk avangin beisei an nei ang.
Brazil hian Copa America hnuhnung ber kha an chawi, mahse an champion ṭum hian hliam vangin Neymar hi a inlan ve thei lo. Tun ṭumah hian Neymar-a'n an ram team hi champion pui ngei a tum ruh hle.