Saints manager-in contract pawtsei

Southampton manager Ralph Hasenhuttl-a'n kum li atan contract a pawtsei a, kum 2024 thleng St Mary's Stadium-ah a cham ang.

Kum 52 mi Austrian coach hian December 2018 khan Saints hi a enkawl ṭan a, hetihlai hian relegation zone-ah an awm. Hasenhuttl ho hian Southampton hi an him hram a, assistant coach Richard Kitzbichler pawhin contract a pawt sei bawk.

Saints manager Hasenhuttl chuan, "Club, player leh fan-te nen inkar a ṭhat avangin thutlukna siam a har lo. Ka rawn thlen tirh khan zinkawng thui tak kan zawh tur atana bul ṭanna a nih thu ka sawi a, tunah chuan hun hrehawm leh duhawm tak tak ka tawng chho tawh a ni," tiin a sawi.

Nikum October thla khan Leicester City-in Saints hi 9-0 zetin an sawp a, Hasenhuttl hi ban theih dinhmunah ding. Southampton-in Austrian coach chungah rinna an nghat a, tunah chuan table-ah 14-naah awmin relegation zone-a awm nen an inkarah point sarih a awm a ni.