Denmark champion dan ngaihnawm tak chu

England-in European Championship-ah nomawi an chawi tawh em? la chawi lo. Zanina an khingpui tur Denmark erawhin kum 1992 khan Euro inelnaah hian nomawi an lo chawi tawh a, an champion zinkawng pawh a ngaihnawm hle.

Kum 29 liam taa Danish Dynamite-in nomawi an chawi hian tun ṭuma keeper Kasper Schmeichel-a pa Peter Schmeichel chu player pawimawh a ni a, final-ah hetih hunlaia World champion Germany an hneh. Hei chauh hi a ni lo, zanina an khingpui tur England nen pawh hian match hmasa berah goal awm loin an inhnehtawk asin.

Thawnthu hlui chu
UEFA hnuaiah ram 33 chauh an la awm a, ram pariat chauhin Euro C'ship hi an hmachhawn thei a, tun aiin inelnaa tel phak hi a har daih tihna a ni. Tunah chuan ram 55 aṭangin ram 24-in an khel thei a, football thiam ram tia sawi ṭhin chu an in pet tling zel a ni ber.

Denmark hi Euro khel tur zawnnaah Yugoslavia, Nothern Ireland, Austria leh Faroe Ireland nen group khatah an awm. He group-ah hian Denmark leh Yugoslavia hi an ṭha fal a, pakhat chauh tling tur an nih avangin an pahnih inkhelh ṭuma chak zawk chu tling turah a ngaih theih.

Yugoslavia hian Copenhagen-ah Denmark 2-0 in an hneh a, Danish Dynamite pawhin khualmualah 2-1 in an hneh let. Amaherawhchu Denmark hi Northern Ireland nen an inhnehtawk a, Yugoslavia erawh inkhel dangah an chak vek avangin pakhatna an ni ta zawk.

'Brazilians of Europe' tia hminglem an pek hial Yugoslavia hian striker ṭha mi Darko Pancev an kawl a, ani hian 1990-91 season khan European Cup-ah Red Star Belgrade a champion pui thei a, kum 1991-ah European Golden Boot a dawng.

Pancev bakah hian Yugoslavia leh Croatia tana khel thei Robert Prosinecki leh Milan midfielder ṭha mi Dejan Savicevic te an awm bawk avangin hmahruaitu an ni hi a mak lo.

Denmark an inpeih lo
Yugoslavia ram chhung a buai a, Yugoslav War vangin United Nations Security Council Resolution 757 chuan May 30, 1992-ah Federal Republic of Yugoslavia a hrem. FIFA leh UEFA pawhin FR Yugoslavia hi an hnuai inelnaa tel lo turin a hrem nghal a, June 10–26, 1992 a neih Euro C'ship-ah an tel thei ta lo.

UEFA-in Yugoslavia aiah Euro tel turin Denmark a thlang a, qualifier match hnuhnung ber an khelhna pawh November 13, 1991 daih a nih tawh avangin Danish Dynamite hian Euro C'hip khel turin ruahmanna an siam tawh lo. Player 20 zinga 13 chu Danish Superliga khel an ni a, May 30, 1992 hian round hnih khelh tur an la nei.

Match hmasa bera England nen an inkhelh hma ni thumah midfielder Kim Vilfort tiamin Brondby player pathum chuan league-ah BK Frem an la hmachhawn. Hetih hunlai hian Denmark-in khawvel player ṭha ber zinga mi Michael Laudrup an kawl a, amaherawhchu Barcelona star Laudrup hi a nau Brian Laudrup leh Liverpool midfielder Jan Molby te nen an coach Richard Moller Nielsen nen an ngaihdan a inan loh avangin November 1990-ah ram tana inkhelh an chawlhsan.

Euro 1992 an khelh theih hnuah pawh Michael Laudrup leh Jan Molby te an inlam let duh lo a, Brian Laudrup erawh ram tana khel turin a kir thung. Michael erawh Euro 92 zawh hnu World Cup khel tur zawnnaah ram tan a kir a, Molby erawh ram tan a khel tawh lo.

Phek hmasa ber
Denmark football chanchina ngaih-nawm ber chu ziah ṭanin a awm ta a, Euro 2020-a an match hmasa berah England an hmachhawn. Richard Moller-Nielsen-a'n defensive game a hlawhtlinpui a, Three Lions nen goal awm loin an inhnehtawk. England squad-ah hian striker chhuanvawr Gary Lineker, midfielder ṭha David Platt bakah rawlthar duhawm Alan Shearer te awm mah se Danish Dynamite lakah goal an khung thei lo.

Match hnihnaah Denmark-in inelna thlengtu Sweden an hmachhawn zui a, Swedish forward Tomas Brolin-a'n goal awmchhun khungin Danish Dynamite hi 1-0 in a chak lo. Hetih hunlai hian a chak zawkin point hnih an hmu a, chak loin point khat an hmu thung. Inkhel dangah France leh England an hmu a, point hnih ve ve an hmu a, hmahruaitu Sweden-in point thum an hmu.

Danish TV commentator chuan Denmark-in Sweden an hneh loh zawh hian a thusawi tawp nan Denmark an tlak thu a sawi a, a chhut chiang tawk lo a tih theih rualin France laka chak lo chiangah a ruat a ni thei bawk.

Mahse maw!
France-in hetih hunlaia player ṭha Jean-Pierre Papin, Eric Cantona, Didier Deschamps leh Laurent Blanc te an kawl a, coach Michel Platini hoin an inringtawk hle. Amaherawhchu Malmo Stadium-ah Denmark-in team ṭha zawka ngaih Les Bleus hi 2-1 in an hneh.

Mak ang reng tak erawh Danish Dynamite hian Henrik Larsen hmangin goal an khung hmasa a, Les Bleus-in Papin hmangin siphurh sut mah se Lars Dahl Elstrup goal hmangin hnehna an chang. Inelnaah hian team riat chauh an tel a, group hniha ṭhen niin a sang pahnih hi semifinal khel turin an tling nghal.

Champion lai hnehtu
Team ṭha bik chauhin inelna an hmachhawn avangin Denmark champion kalkawng hi a harsa hle. Semifinal-ah champion lai Netherlands an hmachhawn a, Dutch team-ah hian Ruud Gullit, Frank Rijkaard, Marco van Basten leh Dennis Bergkamp te an kawl a, nomawi humhim thei tura ngaih an ni.

Semifinal-ah pawh Denmark-in goal an khung hmasa a, Henrik Larsen-a'n minute ngana lekah a tauh lut. Minute 23-naah Bergkamp hmangin Oranje-a'n si phurh a sut a, amaherawhchu Denmark hian Larsen hmang bawkin minute 33-naah hma an hruai.

Denmark hian hun rei tak an goal humhim mah se minute 86-naah Rijkaard-a'n siphurh a sut. Oranje-in chak tumin an nawr chhunzawm a, extra time thlengin goal an khung thei lo. Nielsen-a nauten tlarhnung an veng phui tlat. Penalty shootout hmangin chak zawk zawn a ni a, Peter Schmeichel-a'n Netherlands thiampuipa Van Basten-a pet a dansak a, Denmark 5-4 in an hneh.

World champion hnehtu
Berti Vogts-a kaihhruai Germany an ṭha a, World champion hlim an nih avangin champion tura rin zawk an ni. Amaherawhchu France leh Netherlands hneh thei Denmark-in tum mumal tak an nei a, goal venhim an ngai pawimawh hmasa.

Danish Dynamite hian John Jensen hmangin minute 18-naah hma an hruai a, keeper Schmeichel a chet ṭhat zui avangin Jurgen Klinsmann, Thomas Hassler leh Andreas Moller te telna team Germany-in goal an khung thei lo. Denmark zawkin goal an khung belh a, minute 78-naah Kim Vilfort-a'n chak nemnghehna goal a khung a, 2-0 a chakin an champion.

Pa ropui Nielsen
Richard Moller Nielsen hian kum 1990-a Denmark senior team a enkawl hma hian kum 11 chhung Denmark Under 21 a enkawl tawh a, Danish player-te a hre chiang hle. Final-a goal khungtu Vilfort chuan, "Kan khingpui player-te a hre em em a, chu chu a danglamna a ni," tiin a player-te chauh ni loin a khingpuite pawh a hriatchian thu a sawi.

Nielsen hian thawhrimna a ngaih pawimawh rualin team inlungrualna a thlah thlam lo a, semifinal-ah pawh training ṭhulhin mini-golf an khel a, ṭum dang pawh team inlungrual nan Swedish McDonald-ah chawlin burger an ei ho.

Semifinal-a Netherlands an hmachhawn hmain Nielsen chuan, "Kan chak ang tih ka tiam thei lo che u. Amaherawhchu ka player zawng zawng hian an theihna zawng zawngin an khel ang tih erawh ka tiam a che u," tiin team inlungrualna a ṭhat thu a sawi.

Denmark champion puitu coach Richard Moller Nielsen hi a thluaka bawk awm zai fuh tawk loh vangin February 13, 2014 khan kum 76 mi niin a thi a, a dam chhungin Danish Dynamite-in Euro nomawi an chawi leh tawh lo. Tunah erawh Nielsen-a boruak a reh tawh a, amaherawhchu Nielsen-a hunlai ang thoin team boruak a ṭha. Denmark team hian Christian Erisken tan champion an tum dawn a, England tan a awlsam lo ang.