Australian Grand Prix a awm dawn lo

Coronavirus vangin infiamna khawvelin buaina a la tawk, ram ṭhenkhatah nunpui thei tawh viau mah se harsatna hmun a la tam. Australia chuan tun season chhungin Formula 1 leh MotoGP inelna a thleng thei dawn lo.

Hri len hma, tun hma ang kha chu ni se season khuhhawn nan F1 Australian GP an tlan ṭhin. Mahse, season hmasa khan an tlan thei lo, kuminah pawh a hun hi sawn lailawk a ni a, tunah chuan an ṭhulh chiang ta.

Car intlansiakna sang ber ang bawkin October thla a neih tur MotoGP pawh an tlan dawn lo, an ṭhulh thu hi Australian Grand Prix Corporation chairman Paul Little chuan a puang chiang.

Paul Little chuan, "Australia sorkarin ram pawn aṭanga mikhual zin lut a enkawl dan hi kan zah a ngai, ram pum mipui hriselna leh himna tur an ngaihtuah a vangin keini lamin lo palzut theih a ni bik lo," tiin an ram dinhmun a sawi.

Formula 1 chief Stefano Domenicali chuan Australian GP tlan dawn lo mah se, season tira ruahmanna an lo siam tawh angin intlansiak 23 neih theih ngei an la beisei, tlankawng pakhatah inelna vawi khat aia tam neih theih a ni.