Spinazzola hliam an zai

Italy defender Leo-nardo Spinazzola chu a kaihza thahrui chat avangin zai a ni a, thla ruk tal inkhel loa a chawlh a ngai dawn - a club khelhna AS Roma tan chanchin lawmawm loh a ni.

Kum 28 mi defender hi Euro quarterfinal-a Belgium an hnehna inkhelah a inhliam a, tun inelnaa hming langsar ber pawl ni mah se a tawp dan erawh a duhawm lo hle.

Roma defender chuan, "Hlawhtling takin zai ka ni a, min duhsaktute zawng zawng chungah lawmthu ka sawi. Tunah chuan inkhelh leh hun thlirin ni ka chhiar ṭan dawn a ni," tiin social media lamah a tarlang.

Hliam a tawrh hmaa Tottenham Hotspur nena sawi zawm hlawh hman defender hi Finland-ah zai a ni a, Roma lama a coach thar tur Jose Mourinho chuan a player inhliam hi phone hmangin a be tawh.

Mourinho chuan, "Italy tan chuan channa nasa tak a ni a, thla ruk zet chhawr thei lotu tur ka tan phei chuan pawi tak a ni," tiin Spinazzola inhliam chu pawi a tih thu a lo sawi tawh.