Transfer bazar-ah PSG chet nat an tum

Euro 2020 khelh a nih laiin Paris Saint-Germain lamin transfer bazar-ah thawm an nei ve reng a, thu thar berah chuan Real Madrid captain hlui Sergio Ramos, AC Milan goalkeeper hlui Gianluigi Donnarumma leh Inter Milan defender Achraf Hakimi an lalut dawn.

French club langsar hian Liverpool midfielder Georginio Wijnaldum chu free transfer-in an lalut tawh a, Porto aṭanga loan hmanga an hawh defensive midfielder Danilo Pereira chu a nghetin an lalut fel tawh bawk.

Transfer khawvela journalist rin hlawh Fabrizio Romano chuan PSG hian Ramos, Hakimi leh Donnarumma an lakluh tur thu hi a sawi a, he thuziak i chhiar meuh chuan an in lalut fel tawh hial mai thei.

Kum 35 mi Ramos hian Real a chhuahsan hnuah club nei loin hun a hmang mek a, Romano chuan, "Medical nei turin a inpuahchah mek a, June 2023 thleng contract a ziak ang," a ti.

Nizan lama Euro semifinal kheltu Donnarumma pawh hian Milan a chhuahsan hnuah club a nei lo a, Hakimi nen hian kum nga chhung atan contract an ziak ve ve dawn nia sawi a ni.