John Lundstram-a'n Rangers a zawm

Sheffield United mid-fielder John Lundstram chuan Sheffield-a a contract a hman zawh hnuah Rangers a zawm a, Steven Gerrard-a enkawl team tan hian kum thum daih contract a ziak.

Kum 27 mi midfielder chuan, "Gerrard nen kan inbia a, a hmachhawp leh thil tumte avangin min ti phur hle a ni," a ti a, amah ang thoa Liverpool khaw chhuak Gerrard vanga Scottish Premiership club hi zawm a nih thu a sawi.

Lundstram chuan Gerrard leh a coaching staff-te thawhpui châk vanga Rangers pan a nih thu a sawi a, Champions League khel thei dinhmuna an dinna chuan a hip thu a sawi tel bawk.

Everton aṭanga a career ṭantu Lundstram hian Merseyside club-a a awm lai hian loan-in division hniam lam club hrang hrang tan a khel a, Everton tan a inlan hmain 2015 khan a chhuahsan.

League Two club Oxford United tan season hnih a khelh hnuah kum 2017 khan Sheffield hi a zawm a, Championship-ah season hnih hun hmangin Premier League-ah season hnih a khel bawk.