Zanin dar 12:30 - England Vs Denmark

England mipui ngawihtir kan tum - Hjulmand
Wembley Stadium-ah fans 60,000 a punkhawm theih a, zanina England leh Denmark inkhelah mipui zawng zawng deuhthawin England an ṭan dawn. 

Team ṭha zawk, mahni khelmuala khel tur, fans ngah zawk an nih dawn avangin England-in rin an hlawh zawk a, mahse, hei vang hian Denmark coach Kasper Hjulmand a zam phah lo.
Hjulmand chuan, "Khualmuala inkhel kan ni dawn a, mahse, hei pawh hian nawmna danglam tak a neih avangin kan phur tawh takzet a ni," a ti.

Fans tel lohna
Covid-19 vangin dan khirh tak tak a la awm nual a, hetiang dan avang hian Denmark fan-te pawh an ram team inkhel en turin Wembley-ah an zin thei dawn lo. UK sorkar danah Denmark aṭanga UK-a zinte chu UK an thlen rualin ni 10 tal an inkhunghran a ngai dawn a, Wembley-a inkhel en tuma zin hi Denmark mipui tan awmzia a awm lo.

Hetiang avang hian Danish mipuite chu UK-a cheng tawh phawt chu an ram team inkhel en turin an inchah a, social media lamah pawh he infuihphurna hi hmuh tur a tam hle.

Kan lawm zawk!
Denmark fan-te UK-ah zin thei ta tehreng pawh ni se, an inkhelhna tur hi Wembley a nih miau avangin a letin England fans an tam zawk ang tih a chiang a, mahse, Denmark coach chuan fans an awm hrim hrim tur chu an tan thu lawmawm a nih thu a sawi!

Hjulmand chuan, "Inkhel en tura mipui tam tak an lo kal thei tur hi a lawmawm kan ti a, kan lawm zawk. Danish colour-in stadium chanve deuhthaw hi tuam thei se chuan, kan lawm lehzual ang. "Mahse, kan zam lo - inkhel entute ngawihtir hi kan tum chu a ni a, a harsa dawn tih erawh kan hria," a ti a, Wembley thawm ring tak beng daih an tum dawn.

Kan duh ber chu...
Denmark-in an match hmasa berah nikhaw hre loa tluk avangin Christian Eriksen an chhawr zui thei lo a, Inter Milan midfielder hian football a khelh zui theih dawn leh dawn loh pawh a la chiang lo.

Danish midfielder Thomas Delaney chuan, "Euro ṭantirh khan Wembley-a inkhelh ngei kan tum sa a, harsatna kan tawh zawng zawngte nen phei chuan he hmuna khelh ngei hi kan tum nghet hmiah a ni," a ti.
Delaney chuan, "Wembley tan kan inpeih ta," tiin a sawi zui a, zaninah an inpeih leh peih loh chu a hriat ang. Denmark boss Hjulmand chuan, "Kan thinlunga Eriksen awm chungin kan khel a, inrintawkna kan nei. Theihtawp kan chhuah zel ang," a ti ve bawk.

Thawnthu hlui
Nikum khan UEFA Nations League-ah Denmark leh England an lo intawng tawh a, Copenhagen khawpuiah goal khung loa an inhnehtawk hnuin Wembley-ah 1-0 in Denmark an chak. October-a Denmark chakna inkhelah hian England defender pahnih Harry Maguire leh Reece James te chu hnawhchhuah an ni a, Eriksen-a'n penalty aṭangin goal awmchhun a khung.

Inkhelh zawhah Kasper Hjulmand chuan, "Denmark ram pumpui tan hlawhtlinna a ni a, kum 37 hnuah Wembley-ah hnehna kan chang ve ta - ka nauten hna ropui tak an thawk a ni," a ti a, inelna sang zawkah a aia ropui zawk thlen tir turin hun ṭha an nei. Thlentir thei tak ang maw?

Bukayo Saka-a'n khelh bul ṭan a phu em?
England-in Ukraine 4-0 a an hneh ṭumin Bukayo Saka squad-ah a awm lo a, Arsenal fachuam inlan theih loh chhan hi Germany nen an inkhelh ṭuma a inhliam vang a ni. Saka awm loh ṭum hian Manchester United lakluh tur Jadon Sancho-a'n inkhel bul a ṭan a, Denmark lakah hian Gareth Southgate-a'n tu nge a thlan dawn tih a la chiang lo.

Southgate-a'n Ukraine laka bul ṭantute a rin nawn ringtu an tam rualin uluk taka chhut chuan Saka tan hian hmun a la inhawngah a ngai theih a, chutihrualin Scotland nen 0-0 a an inhnehtawk hnua inlan tawh lo Phil Foden a rawn inlan daih thei bawk.

Saka vs Sancho
Arsenal chhul chhuak Saka hi September 5, 2001-a piang a ni a, kum 19 mi lek a la ni nachungin season hman zawh takah khan Gunners tan player pawimawh a ni pha. 2019–20 season khan Arsenal tan Premier League-ah match 26 a inlan thei tawh a, season liam ta phei kha chuan league-ah match 32 khelin goal nga a khung.

October 1, 2020 khan England tana khel turin koh a ni a, friendly match-a Wales 3-0 a an hneh ṭumin bul a ṭan. June 1 khan England-in friendly match-ah Austria 1-0 in an hneh a, Saka hian goal awmchhun a khung.
Jadon Malik Sancho hi March 25, 2000 khan Camberwell, England-ah a piang a, Watford leh Manchester City youth team-a a inzir hnuin kum 2017 khan Borussia Dortmund a pan. Sancho hian Dortmund-ah hmun pawimawh a chang a, season li chhungin Bundesliga match 104 khelin goal 38 a khung. Euro 2020 khelh laiin German club leh Manchester United hi Sancho manah pound maktaduai 73-in an inrem a, inelna zawh hunah contract ziah fel a ni ang.

Bul ṭan tur zawk
Kum 19 mi Saka hi match hmasa pahniha a khelh loh hnuin Czech Republic nen inkhel bul a ṭan a, mual dinglamah Arsenal winger hi a hmuhnawm takzet a, star of the match-ah thlan a ni. Saka hi attacking leh defending-ah a che ṭha a, inkhelh banah Southgate chuan, "Hun ṭha pekin a awm a, a hmang ṭha a ni. England team a zawm tirh aṭangin training-naah a che ṭha ṭhin a, friendly match-ah pawh a khel ṭha," tiin a sawi.
Southgate-a'n Germany nen an inkhelh ṭumin Saka hi bul a ṭan nawntir a, Arsenal player hian a pu duhthusam tih hlawhtlinsakin German wing back Robin Gosens a dah ṭha. Joachim Low-a hoten mual vei lam aṭangin an nawr thei lo.

Sancho inlan hmasak ber chu Czech lakah a ni a, minute 84-naah Saka a thlak. Dortmund winger hian hming chherna tur khawpa tih ṭhat a nei lo. England leh Ukraine inkhelh ṭumin Saka a inhliam a, Sancho-a'n bul a ṭan ta thung. Dortmund winger hian minute 90 chhung a khel a, a ball thiamnate hmuh theihin awm mah se a khelhpuite chu amah aia langsar deuh vek. Ukraine nen hian Harry Kane leh Raheem Sterling te an langsar a, Sancho aiin Manchester United wing back Luke Shaw a khel ṭha zawk a, bul ṭan nawn lo thei dinhmunah a ding.

Engtin zel?
Nilaini khan Southgate chuan Saka dam ṭhat thu a sawi a, Arsenal winger/wing back hi Denmark lakah hian ṭangkai theihna a nei niin a lang. England khingpui Denmark player zinga hlauhawm ber ang hiala chhal theih chu Joakim Maehle a ni a, Atalanta wing back hi mual sirah a che ṭha ṭhin hle. Kum 24 mi Danish full back hian goal hnih a khung tawh bakah assist vawi khat a nei tawh a, Czech Republic laka Kasper Dolberg a goal khung tur a siam sak phei chu midfielder tam tak tih theih loh tur a ni.

Maehle dah ṭha thei ber tura lang chu Foden leh Sancho ni loin Saka niin a lang zawk a, Southgate hi a fimkhur a nih chuan Arsenal player hian bul a ṭan thei tlat. A chhan chu Saka hian Germany winger Gosens tan hmun awl a siam lo a, ball a khawih tlem tir a, a veng hneh hle.

Saka hi winger leh wing back-a khel thei a ni a, Premier League-a Newcastle an hneh zawhah, "Full back-a khelh dan tur hi ka hre tawhah ka inngai a, winger ho chet duh dan hi ka hria a, an ven dan turah hian ka chiang a ni," tiin a lo sawi tawh. Arsenal rawlthar hi Manchester United-in pound maktaduai 73-a an lak tur Sancho emaw Manchester City champion puitu Phil Foden emaw aia a lut a nih pawhin mak ti suh ang che.