Championship khelh turah QPR lungawi lo

English Football League-in June 20-a Championship khelh a nih tur thu an puan hnu lawkah Queen Park Rangers chief executive Lee Hoos chuan EFL thutluknaah an lawm loh thu a sawi a, EFL chuan thutlukna an siam dawnin an rawn miah loh thu a sawi bawk. 

Hoos chuan, "Mak takin he thilah hian club-te chu a malin tumah rawn kan ni lo a, Championship club-a thawk doctor-te pawh rawn an ni chuang lo. Kan club director of football Les Ferdinand leh manager Mark Warburton-te nen pawh kan sawi ho a, ka ngaihdan hi an ngaihdan chiah niin an lawm lo hle a ni," a ti. 

EFL chuan June 20-ah Championship khelh chhunzawm an tum thu sawi mah se an tumna chu ruahman chhinna chauh a nih thu an lo sawi tawh a, club-te nen indawr tawn reng chunga engkim kalpui a nih tur thu leh an vai him tlanna tur an tlin leh tlin loh thlenga an en reng tur thu an sawi. 

Championship-ah hian match 108 khelh tur a la awm a, hei bakah hian playoff semifinal leh final khelh tur a la awm bawk - playoff hi July thla tawp lamah khelh tum a ni. 

Hoos chuan, "Player-ten training pangngai pawh an la nei thei lo a, chuti chung chuan kar thum chhung leka inkhelh chhunzawm turin min beisei lawi si. EFL hnenah pawh kan lawm lohna kan thlen tawh.

"Championship club-a CEO ṭhenkhat nen pawh kan sawi ho a, keimah chauhin ka ṭang lo tih ka hria," a ti a, league khelh chhunzawm a duh lo - QPR hi table-ah 13-na an ni mek a, match  kua khelh tur an la nei.