Europe-ah intlansiak pariat awm zawn dawn

Formula 1 season chu July 5 hian Austria-ah tlan ṭan a ni dawn a, inelna dang pasarih chu Europe khawmualpuiah vek a zawna neih chhunzawm nghal a ni ang.

F1 thuneitu lam chuan Austria ramah hian July 5 leh 12-ah inelna an buatsaih dawn, intlansiak pathumna chu Hungary-ah neih a ni leh ang. Britain, Spain leh Italy-ah pawh tlan chhunzawm leh a ni dawn.

March thla khan car intlansiakna sang ber hi Australia khawpui Melbourne-ah tlan ṭan tum a ni a, team ṭhenkhat chuan inelna tur hmun thleng hman mah se hri kai hmuh chhuah an awm avangin ṭhulh a ni, tun thlengin an la tlan ṭan ta lo.

Britain rama tlankawng hmingthang Silverstone chuan sorkar thu an hmuh angin inelna pahnih an thleng dawn bawk. Tun season bika intlansiak hnuhnung ber chu December 13 hian Abu Dhabi-ah neih tum a ni.

Formula 1 hi world championship pangngai nei tur chuan a tlem berah intlansiak pariat tal a awm a ngai, inelna buatsaihtu lam chuan intlansiak hmasa pariat tur chu an duang lawk a, a dang erawh tih chian theih a la ni lo.

Mercedes driver Lewis Hamilton-a'n champion nomawi vawi ruk a chawi tawh a, kuminah hian pakhatna a ni leh thei a nih chuan record nei ṭha ber Ferrari legend Michael Schumacher (7 titles) a nih rual thei chiah ang.