Mizoramin an mamawh tawk goal an khung

National Football Championship for Santosh Trophy North East Zone qualifying round-ah Mizoramin nimin khan Arunachal Pradesh 2-0 in an hneh.

Mizoram hian goal hnih an khung avangin an match hnuhnung bera Assam an draw phak hrim hrim chuan final round an lut ang.

Group A aṭanga final round lut tur zawnna hi January 12, Zirtawpni tlai dar 2:00 hian Lammualah neih a ni dawn a, Mizoram leh Assam te an inkhel ang.

Arunachal Pradesh an hneh dan aṭanga thlirin Mizoram dinhmun a chiang ta lo a, Assam-in 1-0 a an hneh Arunachal lakah 2014 champion team Mizoram hi 2-0 chauhin an chak.

Team thar
Mizoramin All India Police Meet khel tur Mizoram Police bakah I League club Aizawl FC aṭanga player an thlan loh avangin Arunachal Pradesh hmachhawn team-ah hmel thar an tam hle.

Lalsangzuala Hmar-in tlar­hmaah mi thar chhawrin Lalrem­ruata chu hma tawngah a awm a, Tuikual North tlangval pui tur hian Chanmari West midfielder Lalromawia awm. Midfield-ah Chhinga Veng duo R. Malsawmtluanga leh Lalrin­chhana te an awm a, Chanmari FC winger Vanlalbiaa Chhangte leh Lalmuanzova-te chu mual sir lamah an awm.

MPL6 best keeper F. Lalmuan­awma leh tawnhriat nei ṭha Lalrin­chhana Tochhawng ten tlarhnung an ho a, Rinchhana hian MPL5 best defender H. Lalhlimpuia kawp puiin sir lamah C. Ramdinmawia leh C. Zomuanpuia te an awm ve bawk.

Khelh thut lu hai
Arunachal Pradesh tan match hnihna a nih laiin Mizoram tan erawh match hmasa ber a nih avangin insiam ṭhat nan hun an mamawh tam hle.

Mizoram player zingah Santosh Trophy vawi khat khelhna an tam avangin khelh chhiat hlau an tam a, hming ṭhat an tum tlan avangin team angin an khel lo. Arunachal lamin Mizoram tlarhnung tan buaina an siam lo a, amaherawhchu mualneitu hian goal hlauhawm an nei tawk lo.

MPL6 best player R. Malsawm­tluanga'n minute 39-naah goal hmahruai a khung a, Mizoram captain hian box aṭanga petin Arunachal player-in a dan per hnuah goal-ah a lut. Minute thum hnuah Lalmuanzova chu box chhung­ah tihtluk a nih avangin penalty a hlawh a, Mizoram defender Lalrinchhana Tochhawng-in goal-ah a chantir leh bawk.

First half-ah Mizoram game duhthusam lohna chu goal hnihin a thup mawi a, inkhel entu mipuiin second half-ah goal nawr na zawk an beisei tih an thawm siam dan aṭangin a lang bawk.

Second half-ah chuan...
Mizoramin bul an ṭan ṭha nghal a, Mabiaa cross chu Remruata'n hnai tak aṭangin crossbar a tauh per a , Tuikual North tlangval hian chance ṭha dang a hlah zui leh bawk.

Midfielder MS-a'n Mizoram tana Santosh Trophy a khelhna hmasa berah goal khung tumin pet hnem mah se goal zawnah a pet fuh hlei thei lo a, goal dang a khung belh lo. Goal duh belhin Mizoram coach-in bench aṭangin Lalram­mawia, MC Malsawmzuala leh Lalrammuanpuia te a luhtir a, goal an keng tel lo.

Siaha tlangval MC-a'n Arunchal defender ṭha taka a bum hnuah goal zawnah a pet thei lo a, goal khung loin a hun a hmang.

Lawm leh lawm lo
Arunchal Pradesh an chak lo zawk chungin team lawm zawk an ni a, coach Kipa Bharat chuan, "Tun hnaia Arunchal Pradesh khelh ṭhat ber ṭum a ni. Assam leh Mizoram lakah chak zo lo mah ila match hnihah goal thum chauh kan chhuah a, kan khelh danah kan lawm a, ka naute ka chhuang em em a ni," tiin Vanglaini a hrilh.

Arunchal hian kum 2014 aṭang­in chak hmel an hmu lo a, an thlen chin a la san loh ang bawkin an lawmna pawh a la hniam.

Mizoram coach Lalsangzuala Hmar chuan, "Kan mamawh tawk goal kan khung avangin result chhia chu ka tiphal lo a, amaherawhchu kan khelh danah lawmna tur ka hre lo. Ka player-te'n an tihtur ang an ti tawk lo a, ṭhiante pek theih reng laia pe lote an awm a, kan khelh dan kan siam ṭhat vat a ṭul a ni. Assam nen kan inkhelh hunah chuan team pawh kan siksawi a ṭul ang," tiin chak mah se an khelh danah a lawm lo tih Vanglaini a hrilh.