Thla ruk hnuah Djokovic a inlan

Grand Slam vawi 12 champion tawh Novak Djokovic chu thla ruk chhung ngawt a kiu hliam vanga a buai hnuah tennis a khel pangngai ve leh thei ta. Nilaini khan Djokovic hi Kooyong Classic exhibition tournament-ah inlanin world number 5 Dominic Thiem lakah 6-1, 6-4 in a chak nghal.

Australian Open vawi ruk champion tawh Djokovic hi kar hmasa khan Abu Dhabi tournament aṭangin a inhnukdawk a, a inlan theih loh chhan hi a kiu dinglam chu duhthusama a la dam chian loh vang a ni. Djokovic hi a dam ṭha tawha ngaih a ni a, record siam tum­in Melbourne Park-ah a inlan zui thei ang.

Kum 30 mi Djokovic chuan, "Ka tan chuan ka chawlh chhunga ka inzirna hman chhuahna hun ṭha a ni a, a bik takin ka kiu nain a tihbuai ṭhin ber service kawngah buaina ka neih loh avangin a lawmawm takzet. Inringtawk tak chungin nuam ti takin ka khel zui thei tawh ang," tiin a sawi.

World number 1 hlui Djokovic hian thla ruk ngawt mai a chawl chu a hun tawna hrehawm pawl a nih thu a sawi a, hun rei lote chhungin tun hma lama a ṭhatna ang kha a neih chhuah leh theih a beisei thu a sawi - Djokovic hi a inkhelh loh rei vangin world ranking lamah pawh 14-naah a tlahniam mek.

Janaury 15 aṭangin kumina Grand Slam hmasa ber Australian Open khelh a ni dawn a, Djokovic hian nomawi a chawi leh a nih chuan champion hnem ber a ni ang. Djokovic chuan, "Kumtirah kha chuan hlauhthawnna a awm a, tunah chuan tournament khel turin ka inpeih, 100%-in ka ṭha vek tawh tihna erawh a ni rih kher lo," a ti.