CAS-in Russian athlete 42 dilna ngaihtuah dawn

Tun hnaiah Russian infiammi 43 zet chu dam­chhung atan hrem mek an ni a, heng zinga 42 te chuan infiamna huanga thubuai ngaihtuahtu sang ber Court of Arbitration for Sport (CAS) hnenah hrem an nihna hi an khing let.

CAS chuan heng in­fiammi 42 te thubuai hi a ngaihtuah dawn a, Janaury 31 hmain an thu­tlukna an puang hman tura beisei a ni. February 9 aṭangin South Korea-ah Olympic Winter Games neih tur a ni a, he mi hma ngeiin thutluka an puan ngei rin a ni.

Dan hremi McLaren-a zirchianna aṭanga a lan danin Russian infiammi tam tak chuan an ram sorkar hriatpuina ngeiin dan an bawhchhia tih hmuhchhuah a ni a, kum 2016 November 1 hnulamah International Olympic Committee (IOC) chuan hremna hi a nei ṭan.

IOC hian Rio Olym­pic-ah khan Russian infiam­mite hi an ram hminga an inlan a phal lo tawh a, dan leh hrai a zam thar hnuaia tling leh thiang­hlimte chu neutral athlete angin an tel a phal sak.

IOC-in a hrem zingah hian Sochi 2014-a gold medal la thei - Alexander Legkov (cross-country skiing), Aleksei Negodailo (bobsleigh), Aleksandr Tretiakov (skeleton), Dmi­try Trunenkov (bobsleigh) leh Aleksandr Zubkov (bobsleigh) te chu hremna khing lettu langsar an ni.