Diego Costa dahsangtu Diego Simeone

Diego Simeone chuan Chelsea aṭanga an laklet Diego Costa chu tun hnaia Atletico Madrid player pawimawh berte zinga mi a nih thu a sawi chhuak. Spain international striker Costa hian Blues aṭanga Atletico a pan hnuah match thum khelin goal hnih a khung tawh.

Thawhlehni zan khan Costa hian third division club Lledia nen Copa del Rey last 16 an khelh ṭum pawhin goal khung lo mah se Yannick Carrasco goal khung tur a siamsak a, si thum faiin hnehna an chang - Atletico hi inkhel hmasa zawkah 4-0 a an chak tawh bawk avangin 7-0 in an tlang.

Atletico Madrid manager Simone chuan, "Costa hi tun hnaia Atletico player pawimawh leh ṭha a ni tih hi sawi ngam a ni," tiin tun hnai match thum a khelh aṭanga goal pathuma inrawlh thei striker a fak hle.

Kum 29 mi Costa hian Atletico Madrid tana hun a hman hmasak laiin La Liga leh Copa del Rey nomawi a chawi pui a, Champions League final vawi hnih a hruai thleng bawk.

La Liga season kal laia pahnihna ni lai Atletico hian Costa bakah Las Palmas lama loan hmanga an kaltir Vitolo chu an ko let. Winger Vitolo hian Lleida lakah a goal hmasa ber a khung ve bawk.

Argentine manager Simone chuan, "Vitolo khan a khel ṭha hle a, team-in kan mamawh ang takin a khel thei a ni. Ball a thunun theiin a chevel a fuh hle," tiin tun hnaia a tlarhmate chetdana a lungawi thu a sawi bawk.