Ahmedabad tan Prannoy a hlu

Indian shuttler HS Prannoy leh Tai Tzu Ying te chuan inkhel pawimawhah hnehna changin, Ahmedabad Smash Masters chu Mumbai Rockets lakah 5-0 in hnehna an chanpui a, Premier Badminton League season lina kal laiah semifinal an inhlanghkai.

Thawhlehni zan Nehru Indoor Stadium-a inkhelah khawtual tlangval Prannoy hian world number 5 Son Wan Ho lakah 15-12, 15-12 in hnehna a chang a, hmeichhe singles-ah Tai Tzu Ying pawhin Beiwen Zhang chu 15-9, 15-12 in a hneh ve bawk. World number 1 Tai hian PV Sindhu a hneh loh hnua a match hmasa berah khawvela ṭha berte zinga mi a nih zia a lantir chiang hle.

Ahmedabad Smash Masters hian PBL league round an khelh tur an khel zo chiah, match nga an khelhah point 17 hmuin hmahruaitu an ni a, palina aia hniamah an tla thla thei tawh lo. Chennai Smashers leh Mumbai Rockets ten beisei an nei tawh lo thung.

Nizan leh zanin hian league round khelh zawh a ni dawn a, Bengaluru Blasters, Hyderabad Hunters, Awadhe Warriors, Delhi Dashers leh North Eastern Warriors ten semifinal beiseina an la nei. PBL hi Janaury 14-ah final khelh tur a ni.