Ka elpuite an ṭha - Federer

Roger Federer chuan Janaury 15 aṭanga khelh ṭan tur Australian Open atan a inpeih tawh thu a sawi a, a elpuite chu player ṭha tak an nih vek thu a sawi bawk.

Swiss star hian season hmasa khan a vawi nga nan Australian Open a chawi a, record thar siam turin Wimbledon-ah a vawi riat nan a champion bawk - Grand Slam nomawi a kawl khawm tawh zat chu 19 niin, ani aia record nei ṭha an awm lo.

Kum 36 mi Federer hian season hmasa bul ṭan nan an ram chu Hopman Cup title a lakpui a, tun season-ah pawh a sulhnu ngai a chhuih leh thei. Federer chuan, "Melbourne-ah inelna hautak hmachhawn tura ka inpeih ran a ngai a, tunah chuan ka inpeih thawkhat tawh," a ti.

Grand Slam vawi thum champion tawh Andy Murray leh US Open champion hlui Kei Nishikori te chu kumina major tournament hmasa berah hian an inlan thei dawn lo tih a chiang tawh.

World number 1 Rafael Nadal pawh tun season a match hmasa berah a chak lo nghal. Serbian tlangval Novak Djokovic pawh hliam vanga season hmasa a buai hnuah inelna lian a hmachhawn lehna hmasa ber tur a ni dawn.

Australian Open champion lai Federer chuan, "Player ṭha sate hliam a dam tawh a, a chhuak tharten phurna nasa tak an nei bawk. Kum tin mai hian inelna a sangin a hautak telh telh a, taksa bakah rilru pawh a inpeih a ngai hle a ni," tiin a sawi.

Player langsar Federer, Nadal leh Djokovic te bakah rawlthar duhawm Alexander Zverev, Milos Raonic, Marin Cilic, Grigor Dimitrov leh Jo-Wilfried Tsonga te chu Australian Open champion ni thei tura rinkai zual an ni ang.