Chennai City leh NEROCA an inhnehtawk

India rama football inelna sang ber I League a ngaihnawm zel a, a mawng lam team ten harhtharna an chan hlawm avangin dah san bik tur an vang tawh hle - Thawhṭanni zan khan Chennai City chuan NEROCA an mikhual a, Manipur club nen hian goal khung loin an inhnehtawk.

Coimbatore-a inkhel entu ṭhahnem tak karah team pahnih an inhlauh tawn avangin beisei angin inkhel a hmuhnawm tawk lo a, goal lut loa inkhel a tawp hi a mak lo - Chennai hi Inrinnia Aizawl FC rawn lenchilh tur club an ni.

Tute nge khel?
Club pahnih 4-4-2 formation ve ve an hmang a, V Soundararajan-a'n tlarhmaah Tamil player duhawm Michael Soosairaj leh Timor Leste internartional striker Murilo Almeida inkawp tir a thlang a, NEROCA boss Gift Raikhan pawhin he formation tho hi hmangin tlarhmaah Bosnian striker Nedo Turkovic leh Nigerian forward Felix Chidi a inkawptir.

Chennai coach-in rin loh takin a striker chhuanvawr Jean-Michel Joachim chu bench lamah a ṭhuttir a, French Ligue 1 club Nancy striker hlui hi Aizawl an lo zin huna chhawr turin a dah ṭha niah a ngaih theih. NEROCA lamah Mizo awmchun David Lalbiakzara chu bench lamah ṭhuttir ni mah se minute 54-naah tlan luhtir a ni a, Mizo tlangval hian goal erawh a keng tel lo.

Inkhel chu
Chennai City-in midfield lai aṭanga inkhel thunun an tum laiin Manipur club erawhin long ball chhawr ṭangkai an tum thung a, club pahnih khelh tum dan a in ang lo. Mualneitu lamin hun ṭha an nei hmasa zawk a, mah se Edwin Vanspaul-a'n Soosairaj tana ṭha zeta a siamsak chu Tamil tlangval kum 23 mi hian goal-ah a chantir thei tlat lo. Chennai tan Murilo-a'n hun ṭha dang a neih chhunzawm a, mah se Hong Kong club ṭha South China striker hlui hi Australian defender Aryn Williams chuan a lo dang hman.

Mualneitu team-in goal khung ngei tumin theihtawp chhuah mah se Burnley defender hlui Williams hoa goal venhim hna thlang NEROCA tlarhnung an paltlang zo tlat lo. Chawlhlawk hman a nih hnuah pawh Chennai bawk hi goal hmaa hlauhawm zawk an ni a, mah se Charles Lourdusamy-a'n a hun ṭha neih a thamral tir ve bawk avangin chungnung zawk awm loin an ṭin ta a ni.