Mancheser City tan pawh Bristol an harsa

Carabao Cup semifinal-ah Manchester City-in Championship club Bristol City an hmachhawn avangin awlsam taka final lut mai tura ngaih an ni a, amaherawhchu Pep Guardiola hote hian Etihad Stadium-ah pawh Manchester United hnehtu Bristol hi 2-1 chauhin an hneh. January 23, Thawhlehni zan hian Ashton Gate-ah League Cup semifinal second leg khelh a ni ang.

Thawhlehni zan inkhelah hian minute 44-naa Bobby Reid-a penalty hmangin Robins-in hma an hruai a, City-in minute 55-naah Kevin de Bruyne hmanga an sut hnuah injury time-a Sergio Aguero tauh luh hmangin hnehna an chang hram. Semifinal lut tura Premier League club pali hnehtu Bristol hi hneh loh nei lo a league hmahruaitu Man City meuh tan pawh khelh an harsa tih chu khawvel hriat a ni.

Pep a fimkhur
City boss Pep Guardiola-a'n inkhelh hmain fimkhur a ṭul thu a sawi lawk a, player thlan danah a thusawi dikna a pholang. Bristol hmachhawn turin City chakna hnar Kevin De Bruyne, Raheem Sterling leh Leroy Sane te an awm a, tawnhriat nei ṭha lo bera ngaih Oleksandr Zinchenko pawh Andriy Shevchenko khuma Ukraine tana goal khung thei naupang ber a ni.

Amaherawhchu, Robins lamin goal venhim hna ṭha taka an kalpui avangin league-a goal 64 meuh khung tawhtu City pawhin paltlang an harsat a, De Bruyne goal khung tur erawh keeper Frank Fielding-a'n a dang ṭha hle. Pep hian striker pangngai a chhawr loh avangin Sterling chu hmatawng berah a dah a, Sergio Aguero leh Gabriel Jesus te awm lohna City tlarhma an hriam tawk lo.

Minute 44-naah City tlarhnung an mualpho a, Eliaquim Mangala-a'n Josh Brownhill lakah ball hlohin Robins midfielder hian Reid tan a pe nghal a, City defender John Stones-a'n dan a tumna lamah penalty a chawi phah. Penalty hlawhchhuaktu Bobby Reid-a'n penalty dang thei keeper Claudio Bravo dan phak loah a khung.

Second half-ah City-in an siphurh an sut hma avangin 'pressure' tam zawk an su kiang. Keeper Bravo ball pek changtu De Bruyne-a'n thui tak a khalh hnuah Sterling a pe a, Liverpool forward hlui hian Beligan midfielder hi pet letin De Bruyne hian yard 16-na atangin cool takin a khung.

Pep-a'n second leg khelh tur la awm mah se chak tumin minute 70-naha Aguero a luhtir a, goal erawh tun season-a an tih tawh thin dan angin injury time-ah an khung chauh. Argentine forward Aguero hian David Silva cross a tauh lut a, City mualpho tur a chhanhim.

Manchester City hian domestic match 33-ah hneh loh an tawng tawh lo a, nikum April thla atang tawh khan English club zingah City hneh thei an la awm lo tihna a ni.

Khawvel hriat Bristol
Bristol manager Lee Johnson chuan, "Kan khelh dan hmang kha a tactical zawnga thlir pawhin a chhuanawm hlein ka hria a, team leh mimal ang pawhin kan che ṭha a ni. Kan khelh dan aṭang khan khawvelin Bristol City an hriat phah a, player hlutna pawh a san phah sawt ang," tiin chak lo mah se an khelh danah a lungawi thu a sawi.

City lam pawhin Bristol an fak a, Ilkay Gundogan chuan, "Lehkhabu hi a kawm aṭanga teh tur a ni lo. Bristol kha khingpui khauh tak an ni a, kan dawhtheihna zarah 2-1 in kan chak hram a ni," tiin twitter-ah a ziak.

Pep-a thukhawchang
Manchester City manager Pep Guardiola chuan, "Tuna kan rilru put hmang ang neih loh chuan eng nomawi mah hi a chawi theih loh. Dinhmun ṭhat laiin kan hmaa thil awm hmachhawn a nuam a, amaherawhchu hun harsaa kan hmaa awm ṭha taka paltlang theih hi fiahna ṭha zawk chu a ni. Tuna kan rilru put hmang hi inelna lian zawk Champions League-ah te a la pawimawh lehzual dawn a, hetiang hian minute tawp thlengin khelh zel kan tum ang," tiin an team rilru put hmang chu a fak.

City hian league lamah point 15-in hma an hruai a, League Cup-a Bristol nena an chakna hi hun tawp dawna chakna goal vawi ruk an khungna a ni.

Khingpuite defensive game khelh vanga sawisel ṭhin Pep chuan Bristol a fak thung a, Spanish manager chuan, "Football khelh tuma Etihad Stadium an rawn pan avangin an fak awm a, an hlawhtlingin ka hria. An player Marlon Pack kha player ṭha tak a nih avangin an nawr ngam a, team pahnihin game pangngai tak kan khel a, football bakah fan leh mi zawng zawng tan a ṭha a ni. Championship lamah a chunglama awm tumin hma an la mek a, an hnathawh hi a fakawm hlein ka hria," tiin a sawi.

Manchester City hian Pathianni zan hian Anfield-ah Liverpool an hmachhawn dawn a, Bristol hian Championship-ah FA Cup-a Chelsea draw-tu Norwich nen an inhmachhawn thung ang.