Pathianniah Kolkata Derby

I League chauh ni lo, India ram football-a ngaihven hlawh ber zinga mi Kolkata Derby chu Pathianni tlai dar 2:00 hian Salt Lake Stadium-ah East Bengal leh Mohun Bagan ten an khelh dawn.

Tun season-a an intawn hmasak ṭumin Aizawl FC defender hlui Eze Kingsley goal hmangin Bagan 1-0 in an chak. Amaherawhchu, East Bengal an che ṭha zui a, Red and Gold hi pahnihnaah awmin match 9-ah point 18 an hmu a, hetiang zat bawka khel Mariners aiin point ngain an hmu tam zawk.

Mohun Bagan-in result ṭha an neih loh avangin an coach Sanjoy Sen chu a bang a, assistant coach Shankarlal Chakraborty hnuaiah Aizawl FC hneh nghal mah se Minerva Punjab an hneh lo zui.

Mariners hian inṭhuah faiin Liberian forward Anusmana Kromah chhuahtirin 2012-13 season a Churchill Brothers champion puitu star striker Akram Moghrabi an lalut. Lebanese striker Kromah hian Goan club tan hian goal 10 a khung.

East Bengal lamin nomawi an duh a, chutihrualin season khata Bagan laka chak loh zawn an duh dawn lo. Khalid Jamil-a'n chak ngei tumin Mohun Bagan a hmachhawn dawn. I League-a Aizawl FC champion puitu coach hian Kolkata Derby zawh hian a club hlui hmachhawn turin Mizoram a rawn tlawh dawn.

East Bengal-in Aizawl FC an hmachhawn hun hi January 20, Inrinni a ni a, Mizo club chuan mipui tana a awlsam zawk nan vawiina Chennai City an hmachhawn hunah ticket an zuar chhuak nghal ang. Ticket hi ṭum dang ang thoin Rs 100 leh Rs 200 a ni.