Manchester club-in Sanchez an duh

Alexis Sanchez chuan Emirates Stadium a chuahsan ngei dawn niin alang. Chile international hian Manchester City a pan ngei dawna a lan hnuah Manchester United an rawn lang a, Arsenal forward season chawhnu lam hmanna tur a chiang lo chhunzawm zel.

Arsene Wenger chuan season tawp ruala contract hmang zo tur Sanchez hi Janaury thlaah a chhuah loh tur thu leh an hnena cham zela tura a duh thu a sawi tawh. Mahse, Sanchez hian contract thar a ziah duh tawh miau loh avangin tun thla chiah hi man neia an hralh theih hun a ni.

Nipui lai khan City leh Gunners te hi Sanchez-a chungchangah pound maktaduai 60-in an inrem hman a, amaherawhchu London club-in a thlakna tur Thomas Lemar chu AS Monaco aṭanga an lak theih loh vang chauha chhuak lo a ni. Pep Guardiola-a'n a player duh hi lakluh a la tum reng, pound maktaduai 20 velin, kar tina £250,000 hlawh turin inremna an siam tawh tia sawi a awm hial.

Man City boruak a len laiin United an rawn lang nghal. Jose Mourinho chuan Sanchez manah hian pound maktaduai 25 bakah Gunners hi Henrikh Mkhitaryan la lut ve thei turin phalna a pe bawk niin khawthlang media-te chuan an tarlang.

Kum 29 mi Sanchez hi Emirates Stadium-ah rilru nghet tak nei chungin a inkhel tawh lo tih chu a chiang a, club lam pawhin a thlakna tur an melh mek. Ligue 1 club Bordeaux tana khel lai, kum 20 mi Brazilian forward Malcom chu Sanchez thlak nana an duh ber nia sawi a ni.

Arsenal leh Chelsea ten League Cup semifinal an khelh ṭumin Sanchez hi bench-ah ṭhuttir a ni a, Wenger thutlukna hian sawi zui a hlawh.

Sanchez rual hian tun hnaia khelhna hmun chang lo Theo Walcott chu chhuak tura ngaih a ni. Walcott hi loan hmanga la duh an tam a, mahse Arsenal chuan a nghet a chhuahtir an duh thung.

Everton manager Allardyce chuan, "Loan hmang chuan a theih ka ring lo, inbiakna a kal mek," tiin a sawi. Allardyce hian Walcott chu tlarhma lama player ṭha a nih thu a sawi tel a, an tawnhriat leh chet ranna chu an hman ṭangkai theih a beisei thu a sawi bawk.

Pathianni zan dar 7:00-ah Gunners hian Premier League khel turin Bournemouth an lenchilh dawn.