Aizawlin Chennai City an mikhual dawn Tlawm turin kan lokal lo – Chennai coach

Vawiin tlai dar 2:00 hian Aizawl FC chuan I League match khel turin Chennai City an mikhual dawn a, RG Stadium-a inkhel tur South Indian club coach V. Soundararajan chuan Aizawlah tlawm tura an rawn zin loh thu a sawi.

Aizawl FC-in an match hnuhnung berah mualpho takin Mohun Bagan an ngam lo a, Aizawl FC coach Paulo Meneses chuan, "Kan insiamṭha nghal dawn a, point thum hmuh tumin kan bei dawn a ni," a ti a, chak result beisei chunga an khelh tur thu a sawi ve bawk.

AFC thar?
Aizawl FC-in thlasik transfer-ah H. Lalmuankima chân mah se Chhinga Veng aṭangin Khawpuimawia an lalut a, Portuguese coach chuan a player thar chungchang hi sawiin, "Squad-ah chuan a awm ngei dawn a, a inkhelh dawn leh dawn loh erawh ka la sawi thei rih lo," a ti.

Mizo club-in Minerva Punjab leh Gokulam an hneh hnuah phurna sang zawk nen Mohun Bagan hmachhawn mah se 2-0 in an tlawm a, Kolkata club laka an khelh danah lawmna tur a awm lo. Paulo chuan, "Ka naute khan ka duhdanin an khel chhuak lo a, he thuah hian zep tur a awm lo. Player pawh ka siksawi ngei dawn a, tu nge ka thlak dawn erawh sawilawk theih a ni lo," a ti a, AFC team thatho zawk kan hmuh tur thu a sawi–I League champion tana thu hriat nuam tak chu hliam vanga Bagan hmachhawn thei lo David Lalrinmuana a dam tawh.

100%
Season ṭantirah hliam vangin Andrei Ionescu inlan thei lo mah se tun hnaiah AFC tan a inlan leh tawh a, Romanian midfielder khelh ṭhat ni chuan Mizo club hi team hlauhawm an ni. Dutch club ṭha PSV Eindhoven aṭanga inzirchhuak attacking midfielder chuan, "Huai taka ka sawi ngam chu 100% pe chungin player te kan khel dawn a, point thum aia hniam kan duh lo," a ti.

Portuguese coach Paulo pawhin a player thusawi hi ṭawmpuiin, "Tunah champion sawi a la hun lo a, ka sawi theih erawh match tinah theihtawp kan chhuah zel ang. Mizo mipuite pawh tun aia tam zawkin min ṭawiawm turin ka duh a, kan chakna hnar an ni. Ka sawi fo ṭhin a, point thum hi kan zavaia kan sual chhuah tur a ni," tiin RG Stadium-ah inkhel en tura kal turin Mizo mipui a sawm.

Hei le Joachim
Chennai City-in an match hnuhnung berah goal khung loin NEROCA an inhnehtawkpui a, he inkhelah hian an striker chhuanvawr Jean-Michel Joachim chu hliam vangin minute 85-naah tlan luhtir chauh a ni. Chennai coach chuan French Ligue 1 club Nancy striker hlui chungchang hi sawiin, "Hliam tenau a nei a, mah se tunah chuan kan rawn hruai tawh. Aizawl FC a hmachhawn ang," a ti a, Tamil coach thusawi hi rin ngam a nih chuan League Two club Carlisle United tana lo khel tawh striker hi en bik a sual lo ang.

Aizawl FC tana thu hriat nuam erawh Timor Leste international Murilo de Almeida chu hliam vangin Aizawla lo zin zingah a tel lo a, Slovenian goalkeeper Uros Poljanec erawh khel tur chiang zinga mi a ni. Slovenia U19 international hlui hi ft 6 leh in 2-a sang a ni a, paltlang a hautak dawn tih a chiang. Chennai hian tun hnaia player ṭhangduang tak Michael Soosairaj an nei bawk a, Tamil player hi I League midfielder hmuhnawm pawl a ni.

A harsa dawn
Chennai City coach V. Soundararajan-a'n season hmasaa Aizawla an lo zin ṭumin boruak danglam chu an chhiatpui thu a sawi a, Tamil coach chuan, "Tunah he boruak hi a danglam thut lo ang. Khualmuala AFC hmachhawn hi chu a hautak ṭhin a ni," tiin RG Stadium-a boruak danglam vangin a player te an buai ṭhin thu a sawi.

Soundararajan chuan tlawm erawh an tum loh thu sawiin, "Tlawm turin Aizawl kan lokal lo a, kut ruaka haw kan tum lo. Chak kan duh ber a, kan tum hmasa ber tur erawh tlawm loh a ni tawp mai," tiin AFC laka an fimkhur tur thu a sawi.