Anfield-ah Premier League hmahruaitu City
"Liverpool leh Manchester United te anga club ropui ni tur chuan nomawi tam tak chawi a ngai a, khelh mawi ringawt hi a tawk lo a ni," tiin Manchester City boss Pep Guardiola-a'n a sawi a, an nomawi chawina kalkawng dal turin an hmaah Liverpool an ding dawn. January 15, Pathianni zan dar 9:30 hian Anfield-ah inkhel hmuhnawm en tur a awm ang.
Liverpool tan pound maktaduai 142-a Philippe Coutinho an chhuahtir hnua an match hmasa ber tur a ni a, 'The Fabulous Four' tia hminglem an pek Mohamed Salah, Roberto Firmino leh Sadio Mane te zinga player langsar ber tia chhal ngam Coutinho tel loa Reds-in team hmuhnawm City dan an tum tur hi hmuh châkawm chu a ni.
City thlanmual Anfield?
Manchester City-in team game hmuhnawm tak pho chhuakin Premier League-ah hma hruai mek mah se an lenluhna tur hi Anfield-a nih miau avangin dah san zawk an harsa–City-in Anfield-a hnehna an chan hnuhnung ber chu May 2003 daih tawh kha a ni a, a hnua match 14 an lenluhah vawi 10 tlawmin vawi li an in draw pui.
September thlaa Etihad Stadium-a team pahnih inhmachhawn ṭum kha chuan City hian 5-0 ngawtin hnehna an chang a, mah se an match hnuhnung palia an tlawm fai vekna Anfield-ah 'result nuam sa' an beisei ngawt a nih chuan an tisual ang.
Goal khung thei
Reds leh City intawn tawhnaa goal khung hnem ber chu hranghlui Ian Rush (goal riat) a ni a, a hnuai chiaha awm chu match 11-a goal ruk khungtu Sergio Aguero a ni. Hriatreng tur erawh Argentine striker goal khungna hi City khelmualah vek a ni a, Anfield-ah goal a la khung lo.
Liverpool tan City ngamtu Michael Owen (goal nga), Steven Gerrard leh Coutinho (goal li) te Anfield-ah hmuh tur an awm tawh lo vek a, Premier League top scorer ni mek Mohamed Salah chungah Reds fan-te beiseina a sang ang–Egyptian winger hian league match 21-ah goal 17 a khung tawh a, inelna hrang hranga match 29 a khelh aṭangin goal 23 a khung tawh!
Klopp vs Guardiola
Competitive match-ah Jurgen Klopp aia Pep Guardiola laka record nei ṭha an awm lo–German coach hian Jose Mourinho nen Pep hi match li ve ve an hneh tawh a, an hnehna chan ang zat Spanish manager laka hnehna chang thei an la awm ngai lo. Mahse, Bayern Munich boss hlui Guardiola hian Klopp hi vawi nga a hneh tawh a, Borussia Dortmund boss hlui lakah a chungnung zawk.
Germany-ah coach pahnih an inel hnuin Premier League an pan ve ve a, tun dinhmunah Klopp aia Premier League ngamtu chu Pep bawk a ni–Spanish manager hian Klopp aia match 30-a EPL match a enkawl tlem chungin chak tam lama German coach a phak lohna chu match li chauh a ni tawh!
Coutinho tel lohna
City ṭantu tan chuan Reds lenchilh dawn taka Coutinho chhuak hi thawk huaina tham a ni ngei ang a, Liverpool midfielder Alex Oxlade-Chamberlain ngaihdan erawh a dang thung. Ox chuan, "Phil a tel loin kan khel fo a, goal khung thei tak tak player kan neih avangin ṭha takin kan khel ṭhin. Coutinho awm loh vangin kan buai lo ang," a ti.
Reds ṭantute tana chanchin lawmawm erawh an tlarhnung pawp reng ṭhin pui turin pound maktaduai 75 man Virgil van Dijk an nei tawh a, Dutch defender hian league match la khel lo mah se Reds tana a match hmasa berah FA Cup khelin Merseyside derby a hmachhawn nghal a, goal a khung bawk–phur takin City a hmachhawn ang.