PBL vâwrtâwp a thleng dawn

Premier League Badminton League final chu January 14, Pathianni zan dar 7:00 hian Gachibowli Indoor Stadium, Hyderabad-ah khelh a ni dawn.

Nizan khan Spanish shuttler Carolina Marin telna Hyderabad Hunters leh India hmeichhe star Ashwini Ponnappa telna Delhi Dashers ten semifinal hmasa zawk an khel a, zanin dar 7:00 hian Ahmedabad Smash Masters leh Bengaluru Blasters te an inhmachhawn dawn. League round-ah hian team khatin match nga zel an khel a, an inkhelh kual vek loh avangin Ahmedabad leh Bengaluru te hi an la intawng lo.

Ahmedabad lam hian hmeichhe world number 1 ni lai Tai Tzu-ying an kawl a, Chinese star hian PV Sindhu lakah 1-2 in a vanduai tih loh chu hnehna a la chang vek. World number 10 Prannoy Kumar pawh vawi ngaah vawi li chak thei a ni.

Bengaluru lamin mipa world number 1 Viktor Axelsen an kawl a, Danish shuttler hian match li a khelah a khingpui a hneh vek a. Ahmedabad captain Prannoy-a'n India rama mipa thiam bera ngaih Srikanth Kidambi hneh tawh avangin khawvela ṭha ber ni lai Axelsen nena an inkhel tur hi a entlak khawp ang.

Team pumpui thlirin Bengaluru aiin Ahmedabad an ṭha zawk a, league round-a an point hmuh zatin team ṭha zawk a sawifiah tawh mah se final lut tur chuan zanina a chet ṭhat a pawimawh ang.