Goal hnih khungtu Messi-a'n Barca chakpui

Lionel Messi-a'n Celta Vigo laka goal hnih khung turin minute 15 bak hun a mamawh lo–Ningani zan khan Copa del Rey inkhelah an mikhual Celta hi 5-0 ngawtin an sawp a, Spanish Cup quarterfinal an lut chiang hle.

Team pahnih intawn hmasakah goal khat ve ve khungin an lo inhnehtawk tawh a, Nou Camp-ah beiseina sang tak nen Celta an lenglut. Mahse, Messi-a'n an khelmualah 'magic' a show a, Celta tlarhnung tan thiam ti taka thlir mai loh chu tih theih a tam lo.

Barcelona ṭha zawk
Team pahnih intum hmasakin Barcelona boss Ernesto Valverde-a'n a player ṭhate chawlh hahdamtirin hun chang tam lo player-te tan hun ṭha a siamsak a, 1-1 in an inhnehtawk. Ningani zana an intawnna inkhelah erawh Spanish manager hian tihsual nawn a tum lo a, Messi, Luis Suarez leh Andres Iniesta ten inkhel bul an ṭan nghal avangin chak an tum tih a chiang.

Barcelona tana chanchin lawmawm chu hliam vanga thla thum ngawt a chawlh hnuah Ousmane Dembele a inlan ve leh ta a, pound maktaduai 135.5 man forward hian minute 59-naah Messi a rawn thlak a, a khel chhe lo. Malpui hliam vanga kar thum vel la inkhel thei lo tur Coutinho dam huna Barca inremkhawm dan tur hi hmuh chakawm chu a ni.

Inkhel chanchin

Barcelona tan Lionel Messi chuan minute 13-na lekah goal hmahruai a khung a, minute hnih a liam hman chauh tihin an goal hnihna a khung chhunzawm–Messi goal khung pahnih hi Jordi Alba siamsak ve ve a ni a, Spanish defender hian minute 28-naah khung ve bawkin Barca tan match khata goal thuma a inrawlh hmasak ber a ni.

Catalan club tan Messi-a'n tun season-ah goal 22 a khung tawh a, heng zinga goal sarih hi chu Alba siamsak a ni. Minute 31-naah Barca tan Luis Suarez chuan goal khat dang a khung ve bawk a, Pione Sisto back pass sual nangchingin Uruguayan striker hian a khung. Hun tawp nan minute thum chauh a awm tawh tihin Rakitic chuan goal khat dang a belh ve bawk a, Barca an chak chiang.