Zaninah Chennaiyin an inlan dawn

Indian Super League inum boruak a sang chho zel a, zanin dar 8:00 hian Chennaiyin FC chuan Pune City an mikhual dawn. Chennai club-in ISL table-ah khelh zat inangah hmahruaitu Bengaluru FC chu point khatin an phak lo mek a, an mikhual Pune City aia an sanna pawh point khat bak a ni chuang lo!

Chennaiyin tan Pathianni tlai dar 5:30-a Delhi Dynamos lenchilh tur Bengaluru tana pressure siamsak turin chak a pawimawh a, Pune tan an chunga awm club pahnih lehpelna remchang a ni bawk–inkhel a hmuhnawm dawn tih a chiang.

Mizo tlangval Jeje Lalpekhlua'n Chennaiyin tan season duhawm a hmang mek a, match kua a khelh tawhah goal ruk khungin Indian player zinga goal khung hnem ber a ni mek–Pune City tlarhnunga Lalchhuanmawia Fanai leh a ṭhianten an ven uluk a ṭul dawn tihna a ni.

Zanina club pahnih inhmachhawn turah Jerry Lalrinzuala leh Isaac Vanmalsawma te hming lam hmaih a thiang lo a, Jerry-a'n Chennai club tan player pawimawh a nihzia a pholan reng laiin Pune-ah Isaac-a pawimawhna a nep bik lo.

Pathianni tlaia Delhi leh Bengaluru inhmachhawn tur hi team in ang lo tak an ni thung. Bengaluru-in an hmahruaina belhchhah an tum laiin Delhi club erawh table aṭanga talchhuah tum team an ni dawn–Delhi tan Lallianzuala Chhangte chu player pawimawh a ni a, Bangalore club lamah Mizoin hmun an chang meuh lo thung.

Lalruatthara khelhna Kerala Blasters chuan khualmualah Mumbai City an lenchilh dawn bawk a, Hmunhmelṭha tlangval khelhna team hi coach thar David James enkawlna hnuaia harhtharna chang mek an nih avangin hmachhawn an hautak ang.