Italy-in Euro 2020 final an thleng ta : It's coming -H-o-m-e- to Rome?

Italy-in penalty hmangin Spain an hneh a, Euro 2020 final an thleng. England-in Ít's coming home,'an tih chu Italian lamin 'Ít's coming to Rome,' tiin champion nomawi chu Rome khawpuia hawn an tum.

Wembley Stadium-a inkhel hmuhnawmah Azzuri-in Federico Chiesa hmangin goal an khung hmasa a, La Roja-in Alvaro Morata hmangin an sut. Hun pangngaiah 1-1 a ni a, penalty shootout-ah Roberto Mancini hote 4-2 in an chak.

Bench aṭanga rawn lut Morata-a'n siphurh sutna goal pawimawh khung mah se penalty-ah a pet goal lo. Italy tana a tawpna bera rawn pettu Jorginho erawhin cool takin goal kilah a pet lut a, inkhel boruak sangah keeper Unai Simon a bum ngam.

Italy-in European Championship-ah a vawi li nan final an lut a; final an khelh hmasak ber 1968-ah champion nghal mah se kum 2000 leh 2012-ah an chak lo ve ve.

European Championship final hi July 11, Pathianni zan dar 12:30-ah Italy leh nizana England leh Denmark chak zawkte'n an khel ang.

Enrique hote
Italy-in nung takin inkhel bul an ṭan a, an goal bawh pawh a na nghal. Amaherawhchu Luis Enrique kaihhruai Spain an tumah an chiang a, inkhel thununtu nih an tum a, an ni ta reng bawk.

La Roja hian first half bikah Azzuri lamah 61% ball possession an nei thei a, Sergio Busquets chu team khaipa a ni a, team anga pressure an pek ṭhat avangin Italy-in an duh angin an khel thei lo tih a chiang.

Darkar chanve vel lekah Roberto Mancini a mangang tih a lang a, Domenico Berardi chu a intih lumtir a, an khelh dan siam ṭha turin Chiesa thlak a tum niin a lang. Leonardo Spinazzola aia lut Emerson Palmieri pawhin goal nawr a pui hlei thei lo a, Italy chhuanvawr Lorenzo Insigne leh Ciro Immobile te aiin Spain forward Dani Olmo a langsar zawk.

Mahse maw!
Tun inelnaa Spain buaina chu goal khung a ni a, quarterfinal khelh zawhah goal 12 zet khungin ram anga goal khung tam ber ni mah se a hmawr an bawk fuh ṭhin lo. Azzuri nen pawh hian Mikel Oyarzabal-a'n chance ṭha bik a hlah a, Ferran Torres leh Olmo te goal khung tur khawpin an ke a hmui lo.

Italy erawh an goal nawr chhunah a hlauhawm zel a, Switzerland nen an inkhelh ṭuma Spain hero Unai Simon a che fuh tawk lo. Athletic Bilbao keeper Simon hian ṭan phatah ball kal dan a chhut sual a, Nicolo Barella-a'n a laksak hman mah se offside vangin a mualpho lo.

Simon hi a insiamṭha lo, Emerson-a ball umluh laksak thei hmanah inngai mah se a tlai chiah avangin goal an chhuah teuh hle. Immobile leh Barella te duh tui vangin an himah a ngaih theih. First half hmuhnawm takah goal hmuh tur a awm lo.

A goal ta
Second half-ah pawh Spain bawkin ball an chang tam a, goal khungna chance pawh an in siam. Mahse, Alvaro Morata leh Gerard Moreno aia thlan Oyarzabal-a'n a hmawr bawk lai tak a ti thei bik lo.

Italy erawhin an chance ṭha neih an khung a, minute 60-naah Chiesa-a'n mawi zetin a pet goal. Goal luh theih nan Insigne-a'n through ball ṭha zet a pe lut a, Immobile-a'n umpha lo mah se Aymeric Laporte-a tackle sawn chu Chiesa-a'n a chang a, Juventus forward hian goal-ah a hlai lut.

Spain-in goal an mamawh a, Morata leh Moreno te an luhtir a, minute 80-naah siphurh an sut. La Roja passing a hmuhnawm a, Olmo leh Morata ten Italy tlarhnung an ṭhiah hnuah Juventus forward Morata-a'n ṭha zetin a pet lut a, 1-1 a ni. Enrique-a'n subsitute a siam fuh a, Mancini erawhin a ti fuh tawk lo a, Marco Verrati hmunruak Matteo Pessina-a'n a luah phui zo lo.

Extra time-ah goal a lut lo a, inkhel erawh a hmuhnawm zel. Dani Olmo freekick pet Italy Donnarumma dansak chu goal teuh zinga mi a ni a, Italy substitute Berardi goal khung erawh offside vangin pawm a ni lo.

Spain-in knockout stage khelh chinah extra time an la khel vek a, match thum ngawt extra time an khelh tawh avangin hun pangngai baka an khelh belh zat hi minute 90 a ni a, match khatin a khel tam a tih theih!

Penalty chu
Penalty hmangin chak zawk zawn a ṭul a, Spain hi penalty hmanga Switzerland hneh zo hlim a ni. Italy tana pet hmasa bertu substitute Manuel Locatelli-a'n a khung lo a, Spain dinhmun ṭhain lang mah se Olmo-a'n a pet over.

Azzuri tana pettu dang Andrea Belotti, Leonardo Bonucci leh Federico Bernardeschi ten an khung a, Spain tana pettu Gerard Moreno leh Thiago Alcantara ten khung mah se Alvaro Morata-a'n a khung lo. Jorginho kutah Azzuri an innghat a, Chelsea midfielder hian Italy mipui lawmna siamin cool takin goal kilah chakna goal a khung.