Copa America : Argentina tan match khat chak a la ngai

Lionel Messi awmna Argentina tan Copa America 2021 champion ni turin match khat chak chauh a ngai ta. La Albiceleste hian nimin zing khan Colombia hnehin final an lut a, a thlengtu Brazil nen Pathianni zingah nomawi an inchuh ang.

Hun pangngaiah 1-1 in an inhnehtawk a, penalty shootout-ah Emiliano Martinez chuan Argentina a chhanhim. Aston Villa keeper hian penalty vawi thum ngawt dangin an ram hi 3-2 in hnehna a chanpui.

Messi hoin
Lionel Scaloni-a'n an captain Messi khelh ṭhat theih dan tur a ngaihtuah a, chutiang tur chuan team a rem - tun thleng chuan a la tisual lo. Messi, Lautaro Martinez leh Nicolas Gonzalez te a inkawptir a, bench lamah Sergio Aguero leh Angel di Maria an awm.

Real Betis midfielder Guido Rodriguez chu midfield lailum luah tura dah niin, Tottenham player Giovani Lo Celso leh Udinese midfielder Rodrigo De Paul ten an thawp a, Atletico Madrid tana season duhawm hmangtu Angel Correa tan hmun a awm lo.

Atalanta defender Cristian Romero chu 100% fit a la nih loh avangin, tawnhriat nei Nicolas Otamendi leh Fiorentina defender leh captain ni bawk German Pezzella te an ding dun - an hnungah Martinez chuan si ban a nghak thung.

Colombia pawhin chak tum ngam turin player an nei ṭha ve tawk. Juventus midfielder Juan Cuadrado hoin an inlan thei; Premier League lama hriat hlawh Davinson Sanchez (Spurs) leh Yerry Mina (Everton) an nei bawk.

Serie A goal khung hnem ber club Atalanta hmatawng Duvan Zapata an nei a, club lama a kawppui Luis Muriel aiah Eintracht Frankfurt forward Rafael Santos Borre an la dah thei bawk, goal vengtu captain David Ospina pawh tlamuanpui tham.

Goal khat ve ve
Estadio Nacional de Brasilia-a inkhelah goal kan hmu har lo. Messi-a'n amah vengtu pathum a paltlang hnuah Nicolas Gonzalez tan a cross a, Fiorentina forward hian goal ban hrulah a tauh chhuak - minute rukna lekah Messi a tal put nawn.

Argentina captain hian defender pahnih a vir khum hnuah box laia awm Martinez a pe, Inter Milan striker hian keeper Ospina dan phak lohin goal kilah a pet lut. Chawlhlawk hma deuhin Colombia midfielder Wilmar Barrios-a'n goal ban a pet per dawp.

Uruguay hnehtu Colombia-in tlawm an tum lo, an palenna hman tumin ball an vawrh kang nasa. Spurs defender Sanchez-a'n corner ṭanga ball kal chu bar a tauh per bawk a, an vannei tawk lo. Gonzalez goal khung tur goal line aṭanga dang hmantu Ospina a vannei ve bawk.

Minute 61-naah Argentina tlarhnung a pawp, midfielder Edwin Cardona through ball dawngtu Luis Diaz-a'n amah vengtu German Pezzella a paltlang a, angle zing tak aṭangin keeper Martinez dan theih lohin a khung.

Bench aṭanga lut Di Maria-a'n Martinez leh Messi tan hun ṭha a siamsak a, mahse an vannei lo. Martinez-a ball pet hi goal line bulah an dang hman; Messi shot pawh keeper-in dang thei lo mah se goal ban a per hlauh.

Chhandamtu Emiliano Martinez
Goal khat ve ve bak an khung thei lo a, extra time khelh a nih loh avangin penalty shoot out hmanga chak zawk zawn a ngai. Copa America final an khelh hnuhnunga penalty hmanga chak lo Argentina player an hlauthawng tih a lang.

Mahse, keeper Emiliano Martinez an nei miau a, Aston Villa keeper hian Davinson Sanchez, Yerry Mina leh Edwin Cardona te penalty pet a dansak vek. La Albiceleste tan Rodrigo De Paul-a'n hlah mah se, Messi, Leandro Paredes leh Martinez ten an khung.

Argentina chak puitu Martinez hi Arsenal aṭanga inzir chhuak a ni a, mahse North London club hian inkhelhna hmun an siamsak mumal thei lo. Inkhelh tam duh vangin Aston Villa a pan a, season duhawm a hman hnuah ram tana inlan turin an ko.

June 12 chu hman ni lawk kha a la ni - thla hmasa tir lam kha chuan Martinez hian ram tan match a la khel ngai lo. Goalkeeper Franco Armani-a'n Covid-19 a kai a, dam tawh mah se hri leng inkaihhruaina vangin a inlan thei rih lo.

Armani khel thei lo hi Martinez tan hun ṭha siamsaktu a ni ve thung. Chile nen an inkhelh ṭumin penalty a dang a, semifinal inkhel pawimawh leh boruak sangah penalty vawi thum ngawt a dang leh - Argentine mipui zingah a hming inzawh nawn a ngai tawh lo ang.

Kum 28 mi Martinez chuan, "Penalty pet turin min cho a, vanneih a ngai hle. Penalty a nih tawh kha chuan ka chungah mawhphurhna a awm," tiin player dang zawng aia mawhphurhna a lak len thu a sawi.
Villa keeper hian Premier League lama a hmelhriat pahnihin penalty an rawn pet dawnin ṭawngkamin a lo chhaih. Sanchez hnenah Martinez chuan, "Unaupa, min hrethiam la ka dansak che a ngai," a ti a, defender ball pet hi a dansak tak tak.

Sanchez dawtah Mina a rawn ding chhuak leh a, keeper Martinez chuan, "I nui vel a, i nuih chhan chu i zam vang a nih kha," a lo ti a, a dansak zui leh bawk. Ram tan match ruk chauh la khel mah se boruak a ngam hle.

Argentina tana kan khelho thei hi la lawmin ka inchhuang, kan hmachhawp pakhat chu kan hlen chhuak leh ta. Hnehna kan chan avangin min hruaitu Pathian chungah ka lawm hle. Emi Martinez hi mi danglam bik a ni a, a theihna kan hrechiangin kan ringtawk bawk. Colombia lam penalty pet kha a dansak ngei ang tih kha kan ring tlat a ni. Hun harsa tak chu a ni ngei a, mahse Emi-a'n kan tum ram min hruai thleng
- Lionel Messi, Argentina captain

Ballon d'Or vawi nga dawng tawh Messi hian tun Copa America chhungin goal li a khung tawh a, a ṭhiante khung tur vawi nga a siamsak tawh bawk. Ram tana nomawi hmasa ber chawi tur chuan Brazil an hneh a ngai dawn.