Suns an chak hmasa phawt

Chris Paul-a'n nghakhlel taka a thlir, tlumtea thlir taka a lo thlir NBA Finals chu a nghak chhuak ve ta. Game 1-ah Phoenix Suns chu Milwaukee Bucks lakah 118-105 in hnehna a chanpui.

Nimin zing khan Talking Stick Resort Arena-ah game hmasa ber khelh niin, regular season hmang ṭha zawk Suns tan hian Paul-a'n point 32 a nei a, ani bakah hian Devin Booker (27 points) leh Deandre Ayton (22) te an khel ṭha bawk.

American tlangval Paul hi kum 36 mi a ni tawh, basketball inelna sang berah hian player ṭha bik 'NBA All-Star' zingah pawh vawi 11 zet a tel tawh - mahse tun hmain NBA Finals hi a la thleng ngai lo.

A tana inkhel pawimawh bikah hian enbik a hlawh a, an chakna hnar pawh a ni. Quarter thumna bikah point 16 a nei a, inkhel boruak sang leh pawimawh an tawn lai taka a chet ṭhat avangin a team a chakpui.

Point guard Paul chuan, "Tun anga khel chhuak tur hian season tluanin kan inbuatsaih a, a taka lan chhuahtir hun kan thleng ta. Kan chak avangin a lawmawm, chutih rualin game 1 chauh a la ni tih kan hriat a ngai," tiin a sawi.

Bucks lamin conference finals tawp lamah hliam vangin Giannis Antetokounmpo an chan. NBA Finals an khelh ṭan hma thlengin an player pawimawh chungchang hi an sawi chiang hleithei lo.

NBA Most Valuable Player (MVP) vawi hnih ni tawh hi a rawn inlan thei a, court chhungah minute 35 hun a hman chhungin point 20 a nei. Khris Middleton (29 points) leh Brook Lopez (17) te khel ṭha ve thawkhat mah se Suns muala chak nan a tawk zo lo.

July 9, Zirtawpni zing dar 6:30 hian Suns mualah bawk game 2 an khel dawn. Bucks tan chak a harsa dawn tih a chiang a, an chak thei a nih chuan an khelmuala game 3 leh 4 an khelh hunah hun ṭha an nei thei ang.