Semifinal-ah Barty a lut

Ashleigh Barty chuan a vawi khat nan Wimbledon semifinal a lut. World number 1 hian amah ang bawka Australian player Ajla Tomljanovic chu darkar khat leh minute ruk chhungin 6-1, 6-3 in a hneh.

Barty hian final lut tur chuan Angelique Kerber a paltlang leh a ngai dawn. Thawhlehni zan inkhel dangah Kerber hian a khingpui Karolina Muchova chu 6-2, 6-3 in a lo hneh ve bawk a ni.

Tun hma chuan Barty hian grass court-ah beisei a phak lo ṭhin. Clay leh hard court-ah khel ṭha ṭhin viau mah se atan All England Club hi hmun ṭha a ni ngai lo, kuminah erawh a record ṭha lo a thai bo mek zel.

Wimbledon 2021-ah hian a match hmasa berah set a hloh leh nghal, rin a hlawh lo zual. A hnu lamah erawh match li chhung chu set hloh miah loin a kaltluang leh ta - a hmabak a ding leh tur erawh Wimbledon champion tawh a nih avangin a awlsam lo ang.

Kum 25 mi Barty chuan, "Infiammite hian thil tum leh chak hi kan nei ve ṭhin, kei pawhin Wimbledon-a hlawhtlin hi ka duhthusam a ni ṭhin," tiin a sawi a, French Open 2019 champion ni tawh mah se grass-ah hlawhtlin ngei a duh.

Inkhel dangah world number 1 hlui Angelique Kerber tan harsatna a awm bik lo. German nula chuan, "Tun hmain Ash nen hian kan inkhel nual tawh a, a chungnung zawk. Grass bikah erawh a vawi khatna a nih dawn avangin ka phur hle," tiin a sawi.

Quarterfinal inkhel dangah Aryna Sabalenka chuan Ons Jabeur lakah 6-4, 6-3 in hnehna a chang a, a vawi khat nan Grand Slam semifinal a lut - a match lehpekah chuan Viktorija Golubic hnehtu Karolina Pliskova nen an inhmachhawn leh ang.