Nipui transfer: Boruak a 'hot' chho ṭan

Euro leh Copa America khelh mek a ni a, inelna pawhin a vawr tawp a thleng chho ṭan - hetiang boruak karah hian European club-ten transfer thawm an nei ve reng a, boruak a 'hot' chho ṭan hle.

Manchester United-in pound maktaduai 73-a Jadon Sancho an lakluh chu tun dinhmuna transfer lian leh langsar ber a ni rih a, Covid-19 boruak nen hei aia lian leh langsar hi a thleng ang em, tih chu zawhna a ni mek.

Manchester City-in Harry Kane leh Jack Grealish an rim thawm a awm mek avangin Sancho-a transfer fee hi khum theihna chance a la awm a, a thleng miah lo thei bawk.

Euro khelh kum a nih avangin European football-a ram leh ram inelna sang bera tel player-ten ngaihven an hlawh lehzual a, Euro zawh rualin transfer bazar a 'hot' lehzual ang.

Hello Kane & Grealish
Kum 27 mi Kane-a'n Tottenham Hotspur thuneitute hnenah chhuah a duh thu a sawi tawh a, City-in pound maktaduai 100 bawr velin English striker hi an ngam nia sawi a ni.

Hetihrual hian Spurs lam chuan an coach thar Nuno Espirito Santo hnenah Kane an chelh theih an rin thu an hrilh a, Kane ngei pawh hian chhuah lam hawiin thu a sawi zawm duh rih lo - mahse, Euro zo se, a dinna tak tak a hriat chauh ang.

City nena sawizawm player langsar dang chu Grealish a ni a, English midfielder hian Gareth Southgate hnuaiah bul ṭan pha lo mah se Pep Guardiola-a duhna a ti dal phak lo a, kum 25 mi midfielder hian City pan turin inremna a nei tawh ang hialah tam tak chuan an tarlang.

Kane leh Grealish an lalut thei a nih chuan City lamin inhralh thawl an mamawh ve dawn tho a, chuti a nih chuan kum 24 mi, Brazil striker Gabriel Jesus leh kum 25 mi, Portugal midfielder Bernardo Silva te chu chhuak tura ngaih an ni.

Player dang hi
England centre back Ben White chu Euro-a hruai zingah tel mah se Three Lions tan a la inlan miah lo a, mahse, Brighton & Hove Albion defender hi Arsenal chuan an iai phah lo - kum 23 mi defender hian season tharah chuan Gunners jersey a ha tawh mai thei.

West Ham-in an midfielder Declan Rice hralh tumna an neih loh thu sawi ṭhin mah se, kan Pathian thu meuhin, "Tangkain engkim a si thlu," a tihna khawvelah hian Hammers hi an ṭang reng theiin a rinawm loh. Kum 22 mi English midfielder hian Euro-ah hun duhawm tak a hmang mek a, club lian tam tak chil a ti put ang tih chu thil chiang sa a ni.

Rice-a'n England tana a kawppui fuh em em mai Kalvin Phillips pawh hi Leeds United-a cham reng tura rin a harsa a, English midfielder hian Three Lions-ah hmun pawimawh chan chhunzawm zel a duh chuan club lian zawk a melh a ngai ngeiin a rinawm.

Tottenham Hotspur midfielder Harry Winks-a'n khelhna hmun a chan tam tawk loh avangin Euro-ah pawh hmun a chang phak lo a, a khelh phakna tur club zawngin mit a len ṭan tawh ang.

Messi & Ronaldo
Copa America khelh mek chu Lionel Messi-a'n ama 'show' ah a chantir mek a, he player hian Barcelona-ah contract thar a la ziah loh avangin free agent a ni mek - hetihrual hian Catalan club chhuahsan tur meuh chuan rin a harsa.

Ṭum dang ang thoin Cristiano Ronaldo chu Manchester United nen sawizawm an ni a, mahse, Juventus-ah kum khat dang cham turin contract a la nei. Kum 36 mi la chhuak turin sum sen hnem a ngai dawn a, a kum zat nena ngaihtuahin United tan 'risk' a sang hret tura ngaih a ni.

Red Devils hian Real Madrid defender Raphael Varane erawh an be ngei nia sawi a ni a, Spanish club hian Santiago Bernabeu-a kum khat contract la nei player hi a lungawina ang zat an zawrh thei rih lo - chuti a nih chuan kum khat hnua a thlawna chhuahtir ai chuan tuna pound maktaduai 50 vela hralh mai chu an duh zawk ngeiin a rinawm.

Ṭum dang ang thoin transfer bazar inhawn rualin Paul Pogba-a'n thawm a nei ve leh ta a, kum 28 mi midfielder hi nakkumah a contract zo dawn mah se United nen pawtsei turin an indawr mek - a hlawh beisei a sang ang tih a chiang a, United tan a harsa mai thei. Chuti a nih chuan nakkuma a thlawna chan ai chuan tuna hralh hi Red Devils tan duhthlan tur ṭha zawk a ni ang.

Euro & transfer
Euro-a khel ṭha player-ten thawm an nei reng a, kum 25 mi Patrik Schick hian kum nga contract a neihna Bayer Leverkusen-ah thla 12 chauh hun la hmang mah se Euro-a goal nga khungtu hian ngaihventu a ngah a, Leverkusen chhuahsan a pawi ti lo ang.

Kum 19 mi Jeremy Doku-a'n sawi a hlawh a, Belgium winger hian French club Rennes-ah kum 2025 thleng contract nei mah se club lian tam tak chil a tih put avangin Ligue 1-ah a cham chhunzawm kher lo mai thei.

Marco Verratti dam hnuah Sassuolo midfielder Manuel Locatelli-a'n Italy tan bul ṭan phak tawh lo mah se a thiamzia erawh kan hmu hman a, kum 23 mi midfielder hi Juventus leh Arsenal ten an team-a seng luh dan an ngaihtuah mek.

Roma wing back Leonardo Spinazzola-a'n Italy tan Euro duhawm tak a hman avangin club thar a zawm ngei tur nia ngaih a ni a, mahse, a inhliam zui avangin thla ruk tal a chawlh a ngai dawn - player inhliam sa lei hi club tam takin an duh dawn lo.

Roma lamah Xhaka?
Arsenal midfielder Granit Xhaka chu Italy lama pem tura sawi a ni a, kum 28 mi midfielder hi Jose Mourinho enkawl AS Roma nen sawizawm mek an ni - Serie A club hi a pan a nih pawhin a mak lo ang.

Xhaka hian Arsenal-ah fak leh sel a hlawh kawp a, Switzerland-in Euro quarterfinal an luhna kawnga a thawhhlawk dan ngaihtuahin Roma chauh lo pawh duhtu an awm nualin a rinawm.

Euro-a player hmuhnawm pawl chu Netherlands leh PSV Eindhoven wing back Denzel Dumfries a ni a, kum 25 mi wing back hian last 16 aṭanga a team a tlakpui chungin Bayern Munich, Everton, AC Milan leh Inter Milan aṭangin ngaihventu a nei.

Portugal midfielder Renato Sanches-a'n a career ṭantirah beisei angin khel lo mah se season hmasa khan Ligue 1-ah Lille a champion pui a, Euro a hmang ṭha takzet bawk - Liverpool leh Arsenal nen sawizawm mek a ni.

Eriksen aiawhtu
Christian Eriksen thachhang dawl turin Denmark squad-ah midfielder Mikkel Damsgaard a awm a, Eriksen-a'n vanduaina a tawh hnuah erawh Sampdoria midfielder thiamzia hmuhtirin kan awm thung.

Kum 21 mi Damsgaard hian European club lian tam tak chil a ti put a, Liverpool hming pawh lam rik a ni. Mahse, kum 2024 thleng contract a la nei a, lei chhuah a harsa mai thei.

Transfer thleng thei tam tak a awm a, chutihruala hriat tel tur chu Covid-19 avangin club-ten pawisa an ngah tawk lo a, City leh PSG erawh talbuai ve lutuk lo tura ngaih an ni.

Hetiang a nih avang hian club ṭhenkhat chuan bank aṭanga sum puk te, share hralh ṭhen te, club hmun hma ṭhenkhat tih ralte chu sum siam nan an hmang mek.