Danny Ings-a'n contract thar a ziak duh lo

Southampton chuan an striker chhuanvawr Danny Ings chu contract thar zawrh mah se a pawm duh lo a, English striker hian top level club tana khelh a duh niin an sawi.

Khawthlang media lamin an tarlan dan chuan Saints chuan Ings hi an player awm tawh zinga hlawh hnem ber ni turin contract thar hi an zawrh a, kum li dang cham turin an thlem.

Mahse, kum 2022 thleng Saints tana khel tura contract nei striker hian St Mary’s lama cham chhunzawm ai chuan chona thar hmachhawn a duh.

Liverpool-a a hlawhchham hnua Saints lama intuaihriam mek Ings hian season hman zawh takah khan hliam vanga a talbuai chungin league match 29-ah goal 12 ngawt a khung a, assist vawi li a nei bawk.

2019-20 season khan a career-a hun duhawm ber anga chhal ngam chu a hmang a, inelna hrang hrangah match 42 khela goal 25 khungin assist vawi thum a nei.

Ings hi Manchester City leh Manchester United ten lakluh an hreh lo nia sawi a ni a, Tottenham Hotspur lamin an lo hel tawh bawk.